پاکستان کې د چاودنې له امله ۷ کسانو ته مرګ ژوبله اوښتې

پاکستاني پولیس وايي د بلوچستان ایالت په خضدار ښار کې د یوې چاودنې له امله دوه تنه وژل شوي او پنځه نور ټپیان دي. پاکستاني پولیس وايي، نامعلومو کسانو په یوه موټرسایکل کې ځای پر ځای شوي چاودېدونکي توکي ځای پر ځای کړي او بیا یې له لرې په ریموټ چاودنه ورکړې ده. ځینو سرچینو د ژوبلو کسانو شمېر تر دې زیات ښودلی دی. عیني شاهدان وايي، پېښه کې وژل شوي کسان ولسي وګړي دي. پاکستاني رسنیو د دغه هېواد د پولیسو په حواله ویلي، چاودنه په یوه له ګڼې ګوڼې ډکه سیمه کې هغه مهال وشوه چې ګڼ شمېر خلک د اختر لپاره په سودا اخیستلو بوخت وو. تر اوسه پورې دا نه معلومه چې دغه برید چا او کومې ډلې کړی خو پولیس وايي په دې اړه یې پلټنې روانې دي.