پاکستان کې د یخنۍ له امله د مړه شویو کسانو شمېر ۲۲ ته لوړ شوی

د پاکستان په مري ښار کې د یخنۍ له امله په موټرونو کې د بند پاتې مړه شویو کسانو شمېر ۲۲ ته لوړ شوی دی. اسوشیټډپرس اژانس راپور ورکړی دی چې اسلام اباد ته نږدې په مري ښار کې د سړې هوا له امله د ښځو او ماشومانو په ګډون ۲۲ کسان مړه شوي او ۱۰ نور ټپيان دي. د پاکستان لومړي وزیر عمران خان دا پېښه یوه تراژیدي بللې او زیاته کړې یې ده چې د پېښې له قربانیانو سره یې د مرستې لپاره د مرستې رسونې سازمانونو ته سپارښتنه کړې ده او ژر به له ځپل شویو سره اړینې مرستې وشي. د یادونې ده چې پرون پاکستاني پولیسو ویلي وو چې مري ښار ته د واورې د سیل لپاره په زرګونو موټر دننه شوي دي او د موټرو د ګڼه ګوڼې له امله ډېری موټر په یاد ښار کې بند پاتې شوي دي چې په نتیجه کې یې خلکو ته یاده مرګ ژوبله اوښتې ده.