د جولای لومړۍ نېټه له چين سره د هانکانګ د بېرته يوځای کېدو له ۲۳ مې کاليزې سره برابره ده. په تېرو ۲۳ کلونو کې د هانکانګ پرمختګ که څه هم له ځينو ستونزو سره مخ شوی، خو په ټوله کې يې وضعيت ثابت او د متمدنيت سويه يې هم ډېره لوړه ساتل شوې ده. څه موده وړاندې په هانکانګ کې تاوتريخوالی او لاريونونه روان وو، چې له امله يې دغه سيمه د جنجال پر ميدان بدله شوې وه او د دې ښار پرمختګ يې سخت ننګولی و. هغو لاریون کوونکو چې تور رنګ جامې به يې پر تن وې ، عامه تاسيسات ويجاړول، د اور بمونو څخه په استفادې يې د پوليسو پر ادارو بريدونه کول، د چين ملي نښان ته به يې سپکاوی کاوه او آن په واټونو کې به يې هغو کسانو ته اور اچوه، چې له دوی سره يې فکري اختلاف درلود. د دغه تاوتريخوالي له کبله هانکانګ له داسې لويې اقتصادي ځوړتيا سره مخامخ شو، چې ساری يې له ۲۰۰۹ کال راهيسې نه دی ليدل شوی او په دغه سيمه کې تجارتي مرکزونو، رستورانتونو او هوټلونو ته څه باندې يو ميليارد او ۹۰۰ ميليونه امريکايي ډالره تاوان اوښتی دی.
دا هم سمه ده، چې لږ هانکانګيان د چين پر مرکزي حکومت باور نه لري. له ۱۹۹۷ کال څخه راپه دې خوا کله چې بريتانيې، هانکانګ بېرته چين ته وسپاره، د دغې سيمې ځينو اوسېدونکو پر خودمختارۍ باور نه درلود او اندېښنه يې لرله، چې د سوسياليستي هېواد تر واکمنۍ لاندې به خپله ازادي له لاسه ورکړي.
اوس په هانکانګ کې د شتمنۍ د نابرابري ويش په اړه د سيمه ييزو خلکو شکايتونه راپورته شوي دي. د بلومبرګ نيوز د شمېرنې له مخې په ۲۰۱۶ کال کې په هانکانګ کې د عايداتو د نابرابرۍ کچه د نړۍ د نورو پرمختللو اقتصادونو په پرتله تر ټولو لوړه وه. په دې سيمه کې کابو ۲۰٪ اوسېدونکي د بې وزلۍ تر کرښې لاندې ژوند کوي او په دې وروستيو کلونو کې په پرله پسې توګه د ژوند لګښتونو لوړېدل د ځايي ځوانانو د ناخوښۍ لامل شوي دي.
تېرکال د هانکانګ د سيمه ييز حکومت لخوا د تښتېدونکو مجرمينو قانون د تعديل په موده کې، ځينو کسانو د هانکانګ له موجودو مسلو څخه په استفادې، د مرکزي حکومت پرضد احتجاجونه او تاوتريخوالی را و پاراوه اود بهرنيو مداخلو تر ملاتړ لاندې يې دغه تاوتريخوالی اوج ته ورساوه.
په دې وروستيو کلونو کې چين چټک پرمختګ کړی دی. امريکا او ځيني غربي هېوادونه هڅه کوي، چې په هره ممکنه لاره د چين د ودې مخنيوی وکړي او په هانکانګ کې روانو احتجاجونو او تاوتريخوالي د دوی د دغه هدف د پوره کولو لپاره زمينه برابر کړې ده.
د چين مرکزي حکومت په داسې حال کې د هانکانګ لپاره د ملي امنيت قانون جوړ کړ، چې په تېرو لاريونونو او غونډو پر مهال له زور څخه استفاده کېده او د هيواد ملي امنيت يې ګواښه. د دغه قانون موخه د هېواد د تجزيې، د حکومت د واکمنۍ د پرځولو، ترهګرۍ او د هانکنانګ په چارو کې د بهرنيو مداخلو پر وړندې مقابله کول او د هانکانګ د ښاريانو او تصديو ساتل دي.
په هانکانګ کې د يادو ټولو مسئلو مخه د ملي امنيت قانون د پلي کېدو له لارې نيول کېدای شي او هانکانګيان په سوله ييز ډول د لاريونونو او غونډو د ترسره کولو ازادي لري.
ځيني غربي سياستوال په دې باور دي، چې د دغه قانون په وضع کېدو سره به د هانکانګ خودمختاري ختمه شي، خو دوی په عين وخت کې په خپلو هېوادونو کې د ورته ډول قوانينو د وضع او پلي کولو په برخه کې هيڅ هڅه نه سپموي. د بېلګې په توګه يې امريکا کې د ملي امنيت قانون، د وطنوالو قانون او داسې نور يادولی شو.
په حقيقت کې د هيواد ملي امنيت ساتل د هانکانګ له خودمختارۍ سره ټکر نه لري. چين په هانکانګ کې د ”يو هېواد او دوه نظامونه “ پاليسي تطبيق کوي، د دغې پاليسۍ بنسټ يوازې د يو چين پېژندنه ده. هانکانګ د چين د يوې برخې په توګه بايد د ملي امنيت ساتلو مسئوليت پر غاړه واخلي. تېر کال په هانکانګ کې د دې سيمې د کورواکۍ د اندېښنې او د عايداتو د نابرابرۍ مسئلو له امله لاريونونه وشول، هغه مهال د هانکانګ ځينو ځوانانو د چين د مخالفينو د لمسون په خاطر”يو هېواد“ په تېروتنې سره”يو نظام“ ګاڼه. که د”يو هېواد “ د امنيت ساتلو لپاره قانوني ضمانت نه وي، نو د”دوو نظامونو“ په چوکاټ کې د هانکانګ خودمختاري او ازادي به رامنځته نه شي. هغه ځوانان چې د ”دوو نظامونو“ د ساتلو غوښتنه يې کړې، ښايي په دې نه پوهيږي چې له دوی څخه د چين مخالفين د خپلې دسيسې لپاره ګټه اخلي.
د هانکانګ لپاره د”يو هېواد او دوو نظامونو“ پر پاليسۍ ټينګار کول د مسئلو د حل يوازينۍ لار ده. حقيقتونو دا ثابته کړې، چې چين په ټول توان د هانکانګ سمسورتيا تامينوي. د بېلګې په توګه د مرکزي حکومت د پاليسيو په رڼا کې د چين د سترې برخې او هانکانګ د ونډو بازارونه سره تړل شوي، په ګوانګ دونګ ،هانکانګ او مکاو دريو سيمو کې د يوې ګډې لويې بندري سيمې د ابادولو طرحه او د يو کمربند او يوې لارې د جوړولو طرحه د هانکانګ د اقتصادي سمسورتيا لپاره ګټوره تمامېدای شي. د چين مخالفين له هانکانګ ګټه اخلي او خپلې سياسي موخې ترسره کوي، خو ځيني هانکانګيان بيا دا نه درک کوي.
