چودري: د اورګاډي مسافرو د ژغورنې عملیات مو بشپړ کړي

د پاکستان د پوځ ویاند احمدشریف چودري رسنیو ته ویلي، چې په بلوچستان کې د «جعفر اېکسپرېس» اورګاډي مسافرو د ژغورنې عملیات یې بشپړ کړي او ادعا یې کړې چې د بلوڅ ازادۍ غوښتونکي پوځ ۳۳ وسله‌وال یې وژلي او یرغمل شوي کسان یې ژغورلي دي. چودري ویلي، مخکې له دې چې پاکستاني امنیتي ځواکونه عملیات پیل کړي، بریدګرو ۲۱ مساپر وژلي وو. نوموړي ادعا کړې چې د عملیاتو پر مهال یرغملو ته زیان رسېدلی نه دی. د بلوڅ ازادۍ غوښتونکي پوځ د بلوچستان په کوټه کې پر تلونکي اور ګاډي برید وکړ چې سلګونه مسافر یې یرغمل ونیول. د دغې ډلې جنګیالیو چې له بمونو ډک واسکټونه یې پر تن دي، خبرداری ورکړی تر هغې به یرغمل خوشې نه کړي چې په خبره یې، له پاکستاني زندانونه یې مشران ازاد نه شي. بلخوا پروم ماښام بیا د بلوڅانو ازادۍ غوښتونکي پوځ ویلي و چې له پاکستان څخه د غچ اخیستلو په دوام یې په تېر یو ساعت کې ۵۰ نور یرغمل وژلي دي.