د ۲۰۲۴ کال د چين او افريقا همکاريز فورم سرمشريزه د سپتمبر په ۵مې نېټې په بېجينګ کې پرانېستل شوه. د چين دولت رئيس شي جين پينګ د دغې سرمشريزې په پرانيستونکو مراسمو کې اعلان کړی، چې هېواد به یې له ټولو سياسي اړيکو لرونکو افريقايي هېوادونو سره ستراتيژيکه ملګرتيا نوره هم ټينګه کړي، د افريقا له لويې وچې سره به د هر موسم د ګډ برخليک ټولنه جوړه کړي، په شپږو برخو کې به ورسره د عصري کېدو چارې پرمخ بوځي او لس همکاريز عمليات به ورسره پلي کړي.
رئيس شي جين پينګ د دواړو خواوو د عصري پرمختګ لوری او لارې روښانه کړې دي.
د چين او افريقا د مختلفو ټولنو شخصيتونو د بېجينګ دغه سرمشريزه په نوې زمانې کې د دواړو خواوو ترمنځ د همکارۍ يوه مهمه پېښه بللې ده.
د بوتسوانا ولسمشر موکګويتسي ماسيسي د سپتمبر ۵مه نېټه د افريقا او چين د اړيکو يوه تاريخي ورځ بللې او د افريقا په اړه د رئيس شي جين پينګ پر اعلان شويو نويو تګلارو يې ډېره خوښي ښودلې ده.
د چين د عصري نړيوالو اړيکو انسټيټوټ د افريقايي چارو مسؤل ښاغلي لي ون تاو ويلي، د چين او افريقا اړيکو په اړه د رئيس شي جين پينګ وروستۍ څرګندونې د دې ښکارندويي کوي، چې دواړه لوري به د نړيوالو اړيکو له سختو بدلونونو سره سره نوی همکاريز حالت جوړ کړي، خپلمنځي دوستي به لا نوره ټينګه کړي، همکاريزو چارو ته به دوامدار پرمختګ ورکړي او يو له بل څخه به ټينګ ملاتړ وکړي.
چين او افريقا د لوېديځو هېوادونو د عصريتوب او استعمار له امله سخت ځپل شوي او دواړه لوري پر دې اند دي، چې له لوېديځو هېوادونو د زده کړې پر ځای باید پخپله د عصريتوب ځانګړې لارې او نقشې وپنځوي.
چيني لوري د بېجينګ سرمشريزې په ترڅ کې د عصريتوب نقشه وړاندې کړې، چې بشپړ سيسټمونه لري او د لوېديځو هېوادونو د عصري کېدو په بهير کې د ځنګلونو قانون ته يې پکې ځای نه دی ورکړی، بلکې د چيني شکله عصريتوب ګټورې تجربې يې پکې ځای کړې دي.
د څېړونکو په اند، دا نقشه د چين او افريقا د ګډ پرمختګ له اړتياوو سره سمون لري او د سراسري جنوبي هېوادونو عصريتوب ته به مرستې او کومکونه برابر کړي.
نو دا نقشه به څنګه پلې کېږي؟
چيني لوري وړانديز کړی، چې چين او افريقا دې په راتلونکو ۳ کلونو کې د متقابلې مدني زده کړې، سوداګرۍ، صنعتي ځنځيرونو، متقابل پيوستون، پرمختيايي همکارۍ، طبي او روغتياي چارو، کرنې، انساني تګ راتګ او کلتوري تبادلې، زرغون پرمختګ او امنيتي چارو په شمول ځينو برخو کې لس همکاريز عمليات په ګډه پلي کړي.
په ياد وړاندیز کې نه يوازې د افريقايي هېوادونو اوسنۍ او بيړنۍ پرمختيايي غوښتنې په نظر کې نيول شوي، بلکې له زماني پرمختګ سره سمون لرونکو لارو ته هم پکې ځای ورکړل شوی دی.
د ساري په توګه، چين اعلان کړی، د ۳۳ افريقايي هېوادونو په شمول د ټولو سياسي اړيکې لرونکو د وروسته پاتې هېوادونو پر وارداتي توکو به صفر ګمرکي تعرفه ولګوي، د افريقا منځنيو او کوچنيو تصديو د پرمختيايي وړتياوو د لوړولو پلان به پلی کړي، د افريقا د ساري ناروغيو مرکز له جوړولو څخه به ملاتړ وکړي، چې په دې سره به د مختلفو افريقايي هېوادونو اړوند توان پياوړی شي، د دواړو خواوو تصدۍ به وهڅوي، چې پانګونې وکړي او افريقا ته به لږ تر لږه ۱ ميليون کاري فرصتونه برابر کړي.
له دغو اقداماتو څخه ښکاري، چې چين د زړه له کومې د افريقايي پرمختګ ملاتړ کوي او د افريقا د پرمختيايي وړتيا له لوړولو سره مرسته کوي او افريقايانو ته واقعي ګټې رسوي.
د ملګرو ملتونو سرمنشي انتونيو ګوټرېش، چې يادې سرمشريزې ته وربلل شوی او ګډون يې پکې کړی، رسنيو ته ويلي، د چين او افريقا همکاريو افريقا ته ګټې رسولي او په دغې لويې وچې کې يې له سولې او پرمختګ سره پورته مرستې کړې دي.
