د چين حکومت د سږ کال د جنورۍ له اتمې نېټې څخه د کرونا وبا د وقايې او ادارې تدبيرونه له ( د دوهمې کچې ساري ناروغۍ پر وړاندې د لومړۍ کچې تدبير) څخه ( د دوهمې کچې ساري ناروغۍ پر وړاندې د دوهمې کچې تدبير) ته تعديل کړي دي. دا په چين کې پس له درېيو کالونو، د کرونا وبا د وقايې او ادارې په جريان کې يو ستر او مهم بدلون بلل کېږي او ډېر اهميت لري. کرونا وبا د تېرو درېيو کالونو په بهير کې پر زياتو نړيوالو چارو منفې اغېزې کړي، خو د چين حکومت له دغو اغېزو سره سره د وبا د ښه کنټرول تر څنګ خپل اقتصادي پرمختګ هم پياوړې کړی دی.
په ۲۰۲۰م کال کې د چين د کورنيو توليداتو عمومي اندازه لس زره ميليارډو ژن مين بې يوانو ته رسېده، چې دغه رقم د ۲۰۱۹م کال په پرتله دوه اعشاريه درې فيصده زياتوالی ښوده. چين په همدې ۲۰۲۰م کال کې يوازينی عمده نړيوال اقتصاد و، چې اقتصادي وده يې مخ په زياتېدو وه.
په ۲۰۲۱م کال کې د چين د کورنيو توليداتو د عمومي اندازې د زياتوالي انډول په سلو کې اته اعشاريه څلور ته رسېدلی و، چې دغه انډول له تېرو لسو کالونو راهيسې ډېر لوړ او د نړيوال پولي صندوق او د چيني حکومت له ټاکل شوو هدفونو څخه هم زیات و.
انلاين سوداګري په همدې کال کې د چين د اقتصاد د زياتوالي عمده ټکی ګرځيدلی او د دې هېواد د کورنيو توليداتو په عمومي اندازې کې يې څلوېښت فيصده ځای نيولی و.
په چين کې د ۲۰۲۲م کال په يوولسو مياشتو کې د انلاین پرچون خرڅلاو اندازه د ۲۰۲۱م کال په پرتله په سلو کې څلور اعشاريه دوه زياته وه. اټکل کيږي، چې په همدې تېر ۲۰۲۲م کال کې به د چين د اقتصاد عمومي اندازه يو سل او شل زره ميليارډو يوانو ته ورسېږي.
له دغو شمېرو څخه څرګندېږي، چې د چين حکومت د کرونا وبا د وقايې او ادارې په درشل کې د اقتصاد د پياوړتيا لپاره اغيزمن تدبيرونه نيولي او په رڼا کې يې د چين د اقتصاد قوي پټ ځواک او سالم پرمختګ ښکاره شوي دي.
د چين د اړوندو تدبيرونو تر تعديلولو وروسته، د چين په کورنيو کې بازار لا سمسور او اباد شوی دی.
د چين د اوسپنيزو لارو ملي ادارې د تېر ۲۰۲۲م کال د ډسمبر په ۳۰مې نېټې د نوي يا ۲۰۲۳م کال لپاره د درېيو ورځو رخصتيو په مناسبت ځانګړې ترافيکي چارې تنظيم پېل کړې وې. د مالوماتو له مخې، په چين کې د نوي کال د درې ورځنۍ رخصتۍ په موده کې هره ورځ ۵ ميليونو او ۸۰ زرو کسانو په اورګاډيو کې تګ راتګ کړی، چې دغه رقم د ۲۰۲۲م کال د نومبر مياشتې د منځنۍ اندازې په پرتله ۱۰۹٪ زياتوالی ښيي.
د ۲۰۲۳م کال د پسرلني جشن لپاره د چين د انلاين سوداګرۍ فېسټېوال په لومړۍ ورځ، په چين کې د انلاين پرچون خرڅلاو عمومي اندازه ۴۵ ميليارډه او ۲۰۰ ميليونو يوانو ته رسېدلې، چې دغه رقم د تېر کال د همدې مودې په پرتله په سلو کې شپږ اعشاريه پنځه زياتوالی ښيي.
په چين کې د نوي کال په درې ورځنۍ رخصتۍ کې د فلمونو د ټکټونو د پلور ګټې ۵۵۰ ميليونو يوانو ته رسېدلي، څه باندې ۱۲ ميليونو او ۵ سوو زرو نندارچيانو په سينيما ګانو کې فلمونه کتلي دي او په همدې مودې کې د مختلفو فلمونو د نندارو شمېر له يو ميليون څخه پورته ښودل شوی دی. د نوي کال په درې ورځنۍ رخصتۍ کې د چين د پوستي ادارو د بستو د لېږد رالېږد عمومي شمېر له ۲ ميليارډو او ۱۳۰ ميليونو څخه اوښتی و، چې دغه رقم د تېر کال د همدې مودې په پرتله لس فيصده زياتوالی ښيي.
له يادو شمېرو څخه څرګندېږي، چې د نوي کال په درې ورځنۍ رخصتۍ کې د ټرانسپورټ، انلاين سوداګرۍ، سيلانۍ او رسټورانټونو په شمول د چين اقتصاد د سمسورتيا په حال کې دی او خوځنده ځواک يې نور هم پياوړی شوی دی.
ويل کېږي، چې د کرونا وبا د وقايې او ادارې په برخه کې د چين نوي تدبيرونه به د چين او نړۍ د اقتصادي پرمختګ لپاره ښه زمينه برابر کړي.
د جنورۍ په اتمه نېټه، د پولنډ له وارساو څخه بېجينګ ته د CA738 نمبر الوتکه د بېجينګ نړيوال هوايی ميدان کې ښکته شوه او دا د چين د کرونا وبا د نويو تدبيرونو تر پلي کېدو وروسته بېجينګ ته لومړی نړيوال مستقيم پرواز و.
بر سېره پر دې، په چين کې د زياتو هېوادونو سفارتونو او سيلانيزو ارګانونو په خپلو ميکروبلوګپاڼو کې چيني سيلانيانو ته بلنې ورکړي، چې د پسرلني جشن په رخصتيو کې د دوی هېوادونو ته سفر وکړي. ټوله نړۍ هيله لري، چې چيني سيلانيان د بېلا بېلو هېوادونو د سيلانيزو چارو د بيا سمسورتيا لپاره خوځنده ځواک برابر کړي. له دې څخه څرګندېږي، چې چين د کرونا وبا د قوايي او ادارې تدبيرونو په تعديلولو سره نړۍ ته د ګډ پرمختګ فرصت برابروي او د چين اقتصادي سمسورتيا او پرمختګ د نړيوال اقتصاد مهم اېجين او ځواک دی.
