د فلسطين د داخلي جوړجاړي د درې ورځني ډيالوګ غونډه د جولای په ۲۳مې نېټې په بېجينګ کې پای ته ورسېده او څوارلسو سياسي ډلو یې د چين په منځګړيتوب په ګډه ((د فلسطين د ناندريو د ختمولو او د داخلي يووالي د پياوړتيا په پار د بېجينګ اعلاميه )) لاسليک کړه چې د جګړې زيانمن شويو فلسطينيانو سره يې هیله پيدا کړې ده. چين تل د منځني ختيځ مسئلې په هکله عادلانه رويه غوره کړې او د دې سيمې د سولې جوړونکی پاتی شوی چې په نړيواله ټولنه کې د هرکلي وړ ګرځېدلی دی.
د فلسطين د څوارلسو سياسي ډلو جوړجاړې يو اسان کار نه دی او د دې ملت د ازادېدو چارو په تاريخ کې د اهميت وړ شېبه هم ده. د دې غونډې تر ټولو مهمه ګډه نظريه د يادو سياسي ډلو جوړجاړی او يووالی دی او تر ټولو کليدي لاسته راوړنه يې دا ده چې د فلسطين ازادي غوښتونکي سازمان يعنې فتح د ټولو فلسطينيانو يوازينی قانوني استازیتوب دی. تر ټولو د پاملرنې وړ ټکی دا دی چې هغوی تر جکړې وروسته د غزې د ادارې او د لنډمهاله حکومت په هکله اتفاق ته رسېدلي دي. دغه راز د دوی تر ټولو کلکه غوښتنه دا وه چې د ملګرو ملتونو د اړوند پرېکړه ليک له مخې يو خپلواک فلسطين هېواد جوړ کړي.
د فلسطين مسئله تل د منځني ختيځ کليدي برخه ده، خو د فلسطين داخلي جوړجاړی د دې مسئلې د حل وفصل او د دې سیمې د سولې او ثبات د عملی کېدو يو مهم ګام بلل کیږي. چین تل په دې اړه عادلانه رويه غوره کړې او کوي يې. چين په روانه غونډه کې په غزه کې د شخړو په هکله د درېیو اقداماتو وړانديز وکړ او له اوسنيو ستونزو څخه د فلسطين د وتلو لپاره يې خپله طرحه بیان کړه.
د فتح د رئيس مرستیال ويلي چې چين د يوې رڼا په څېر دی او د فلسطين د داخلي جوړجاړي لپاره يې هڅې بې سارې دي. د منځني ختيځ د سوله ييز بهير په تړاو د اروپايي ټولنې ځانګړي استازي کوپمانس د چين کړنه ستايلې او پر دې يې ټينګار کړی چې دا د ليدو وړ لاسته راوړنه ده او ترې ښکاري چې چين د فلسطين د داخلي جوړجاړي د پرمخ بيولو، په غزه کې د اوربند د عملی کېدو او د جګړې د پای ته رسېدو او د دې سيمې د سوله ييز بهير په برخو کې یې رغنده رول لوبولی دی.
د ۲۰۲۳م کال په اکتوبر کې د فلسطين او اسرائيل ترمنځ د روانې شخړې له پيلېدو راهيسې چين د عامو وګړیو پر وړاندې له هر ډول بريدونو سره ښکاره مخالفت څرګند کړی او د جوړجاړي او سوله ييزو خبرو اترو د پرمخبيولو او د شخړو د له منځه وړلو لپاره يې ډېرې فعاله هڅې کړې دي. د چين لوري څو څو ځلې د يادو شخړو په هکله د چين دريځ بيان کړی او د جګړې له ښکيلو خواوو څخه يې غوښتنه کړې چې سمدلاسه اوربند وکړي، جګړه پای ته ورسوي، د شخړو د پراخوالي مخه ونيسي او بشري مرستې تضمين کړي. دغه راز چين پر دې ټينګار کړی چې د فلسطين او اسرائيل ترمنځ د مسئلې د حل وفصل بنسټيزه لاره د دوو هېوادونو د لايحې پلی کول دي، تر څو د فلسطین مسئله ژر تر ژره په هراړخيزه توګه، عادلانه او دايمي توګه حل شي. سربېره پر دې چينايي استازو هم څو څلې د سيمې له هېوادونو څخه ليدنې وکړې او د نړيوالې سولې په غونډو کې يې د ګډون له لارې د دغې مسئلې د حل لپاره منځګړیتوب کړی دی. د تېر کال په نومبر کې چين د م.م د امنيت شورا د نوبتي رئيسه هېواد په توګه په خپلو هڅو سره د دې شخړو د روان پړاو له پيلېدو راهیسې د امنيت شورا لومړی پرېکړه ليک تصويب کړی چې له امله يې د فلسطين او اسرائيل ترمنځ د اوربند ابتدايي ګام هم پيل شوی دی. سربېره پردې چين د فلسطين او اسرائيل د شخړې د ختمېدو په تړاو د چین سندونه خپاره کړي او په دوامداره توګه يې د غزې له ځايي وګړو سره بشري مرستې کړې دي.
د روان کال په می کې د چین او عربي هېوادونو ترمنځ د همکارۍ فورم د وزيرانو په کچه لسمه غونډه په بېجينګ کې تر سره شوه. چين پکې له اړوندو عربي هېوادونو سره د فلسطين مسئلې په هکله يوه ګډه اعلاميه خپره کړه او د دې مسئلې د حل لپاره يې د سولې او عدالت د ساتلو اواز راپورته کړی دی.د فلسطین د ملي وړانديز د سازمان رئيس مصطفی برغوثي ويلي : چین د فلسطين د داخلي يووالۍ او د فلسطينيانو له حقونو څخه د ملاتړ په برخه کې ډېر مهم رول لوبولی دی. چين ډېر صادقانه او سم نظر لري او په واقعي توګه زمونږ په کورنيو چارو کې د نه لاسوهنې په حال کې را سره مرستې غواړي.
چين تل د منځني ختيځ د سولې جوړونکی پاتی شوی او د دې سيمې د ثبات د پرمخ بيولو لپاره يې هڅې کړې دي.
