هر کال د اکتوبر په لومړۍ نېټې د چین ولسي جمهوریت د جوړېدو ملي جشن لمانځل کېږي، چې سږ کال يې د تاسیس ۷۵مه کلیزه ده او په وياړ يې د دغه هېواد په ګوټ کوټ کې د لمانځنې رنګارنګ فعالیتونه ترسره شوي دي.
سږني ملي جشن ځینو چینایانو ته ډېره خوښي او ژوره خاطره وربښلې، ځکه د چين حکومت په لبنان کې بند پاتې چينايان په ډېرې چټکۍ خپل هېواد ته ستانه کړې دي.
د چین بهرنیو چارو وزارت له ټرانسپورټ وزارت، ملکي هوايي چلند ادارې او په لبنان او قبرس کې د چین سفارتونو سره نږدې همکارۍ او کوښښونه کړي او په لبنان کې یې د مېشتو چینایانو خوندیتوب تضمین کړی دی او دغه راز د اکتوبر په لومړۍ نېټې يې د ښکیلو خواوو په ګډو هڅو په لومړۍ ډلې کې ۶۹ چینایان او د دوی د کورنيو او خپلوانو ۱۱ بهرني غړي د چیني شرکت په يوې بېړۍ کې قبریس ته رسولي او د همدې مياشتې په ۲مې نېټې يې په دوهمې ډلې کې ۱۴۶ چینايان او د دوی د کورنيو ۵ بهرني غړي د ځانګړې الوتکې له لارې بېجینګ ته رسېدلي دي.
په لبنان کې امنیتي وضعیت ترینګلی شوی او چين له دغه هېواد څخه خپل اتباع په داسې حال کې وباسل، چې اسرائيلي ځواکونه پرې مسلسل هوايي بريدونه کوي. دا یوه ستونزمنه چاره وه، چې د چين حکومت ترسره کړه او په تېره بیا په الوتکې کې د خپلو اتباعو د اوباسلو چاره يې ډېره ستایل کېږي، ځکه د لبنان د بیروت هوايي ډګر له دوو اونيو راهيسې غیرفعال شوی، کارکوونکي یې نشته او هیڅ الوتنې ترې نه کېږي.
بله خوا، د لبنان او اسرائیل د شخړو تر سختېدو مخکې، د بیروت او چین ترمنځ مستقیم پروازونه هم موجود نه وو، نو چین یو لړ ستونزې وګاللې او ځانګړې الوتکه يې د بیروت نړیوال هوايي ډګر ته ولېږله او په لبنان کې مېشت چينايان يې خپل هېواد ته راستانه کړل.
په لبنان کې پاتې چينايان چې کله د بېجینګ نړیوال هوايي ډګر کې ښکته شول، نو ډېر خوشحاله او له خپل حکومته یې مننه کوله.
په دوی کې څو کسانو رسنيو ته ویلي:
((کله چې مونږ د خپل هېواد خاورې ته را ورسېدو، نو ډېر خوشحاله شوو او دا احساس مو وکړ، چې مونږ اوس خوندي او امنیتي چاپېریال کې یوو.))
((مونږ له خپل هېواد څخه ډېره مننه کوو او دا احساس يې راکړی، چې جنګ سخت دی او خپل هېواد هر وخت مینه درکوي. مونږ که هر چېرته یوو، نو له ځان سره د خپل هېواد ټينګ ملاتړ لرو.))
چين خلکو ته لومړیتوب ورکوي او دا له چینایانو سره د چین د کمونېست ګوند او حکومت جدي ژمنه ده او هر وخت یې پلې کړې ده.
د چین کمونېست ګوند د چین ولسي جمهوریت د جوړېدو د ۷۵ کلونو په درشل کې تل خپلو خلکو ته لومړیتوب ورکړی دی.
په چين کې د خلکو سويه لوړه شوې او په دغه هېواد کې ثسبتاً شتمنه ټولنه جوړه شوې ده.
د چين د کمونېست ګوند په يادې ژمنې کې د خلکو د ژوند تضمین هم راځي او هر وخت يې د دوی ژوند ته پاملرنه کړې ده.
د چين حکومت مخکې له لیبیا او اوکراین څخه خپل اتباع په چټکۍ وباسل او خپل هېواد ته يې خوندي راستانه کړل.
له لبنان څخه راستانه شويو چینایانو په ډېر مينې او لوړ غږ خپلو هېوادوالو ته د نوي چین د تاسیس د ۷۵مې کلیزې مبارکي وویله.
