د کرنې او مالدارۍ وزارت ویاند اکبر رستمي زیاتوي چې د دوی لومړنۍ څېړنې ښیې چې سږکال به د جلغوزو په حاصلاتو کې دوه برابره زیاتوالی راشي.
د نوموړي په خبره، تېر کال په هېواد کې د جلغوزو حاصلات ۲۳ زره ټنه وو. رستمي وايي، چې خوست، پکتیا، پکتیکا،کونړ او ننګرهار له هغو ولایتونو دي چې پکې د جلغوزو ډېر حاصلات کېږي.
د کرنې وزارت دغه راز وايي چې روان کال د جلغوزو حاصلات ځکه زیات شوي چې د پروسس او بازارموندنې لپاره ډېر کار شوی دی.
د یاد وزارت د چارواکو په خبره، تر دې وروسته به د افغانستان په مارک جلغوزي بهر ته صادر شي. دغه وزارت وايي، سږ کال له چین سره د جلغوزو قرارداد شوی او هڅه روانه ده چې له نورو هېوادونو سره هم تړون وشي.
د یادونې ده چې افغانستان هر کال بهر ته د جلغوزو د صادراتو له درکه په میلیونو ډالره عاید ترلاسه کوي.
