د کابل په ریشخورو سیمه کې د شيدو د پروسس د فابریکې تجهیز او رغنیزې چارې نږدې ۸۵ سلنه بشپړ شوې دي.
دغه فابریکه په ورځ کې د نږدې ۴۰ زره لېتره شیدو د پروسس په وړتیا سره، په یوه وخت کې د اووه ډوله لبني محصولاتو د تولید وړتیا لري. یاده پروژه د مالدارۍ په برخه کې د کرنې وزارت یو له مهمو پروژو څخه دی، چې د کرنې د پراختیا نړیوال صندوق «IFAD» له خوا تمویلېږي.
دغه فابریکه په اته جریبه ځمکه کې جوړېږي. دغه فابریکه د کابل، پروان او لوګر له ولایتونو څخه د شېدو ټولولو له مرکزونو اومه شیدې راټولوي او پروسسوي.
د دې فابریکې د رغنیزو چارو په بشپړېدو او د فعالیت په پیل سره به د یادو ولایتونو د ولسوالیو او کلیو د مالدارانو د شیدو پلور ته زمینه برابره شي او په دغو سیمو کې د لبنیاتو تولید پراخ او د مالدارانو د عوایدو د زیاتوالي لامل شي.
