‎ګوندي سياليو د امريکايانو خوب تښتولی

د امريکا مشهور خبريال نولان سيګټون د امريکا کانګرس کيپيټل هيل (Capitol Hill)د کړکېچ په هکله ليکلي، که امريکا د ډيموکراسۍ پر وړاندې شته سيستماتيکې مسئلې حل نه کړي، نو د ياد کړکېچ په اړه د ګواهۍ اوريدلو غونډې به يې هيڅ اغيزې ونه لري.
‎د امريکا د استازيو مجلس ځانګړې څېړنيزې کميټې د جون تر ۱۴مې نيټې پورې د کيپيټل هيل د کړکېچ په اړه د ګواهۍ دوې غونډې تر سره کړې دي.
‎سي اېن اېن په يوې تبصرې کې ويلي، چې د امريکا د استازو مجلس دغه دوې غونډې په ژوندۍ بڼه خپرې شوې چې هر امريکايی د ياد کړکيچ بدې اغېزې په ياد کې وساتي او نړيوال له دې لارې د امريکا ډيموکراسي بيا وڅاري.
‎د امريکا د پخواني ولسمشر ډونالډ ټرمپ زرګونو پلويانو د تېر کال د جنورۍ په شپږمه نېټه  د کانګرس ودانۍ ته ننوتل او په زور يې غوښتل، چې د ولسمشريزو ټاکنو پايلې بدلې کړي.
‎په دغه تاوتريخوالي کې پنځه تنه ووژل شول او شاوخوا ۱۴۰ پوليس پکې ټپيان شول او د دغه تاوتريخوالي په تړاو ۷۰۰ کسان ونيول شول.
‎دغه پېښه د امريکا پر ډيموکراسۍ سخت ګزار بلل شوی
‎ظاهرأ د دغې پيښې لامل دا ښودل شوی، چې د ډونالډ ټرمپ پلويانو د ولسمشريزو ټاکنو پر پايلې خوښ نه وو، خو حقیقت دا دی، چې دغه پېښه د امريکا په کور دننه د اوږدمهالو سختو مخالفتونو له امله رامنځته شوې او د دغه هېواد په سياسي قطب کې د لوی درز ښکارندويي کوي.
د يادو دوو غونډو زياتې ويډيوګانې او مهم اسناد خپاره شوي دي.
دغه ويډيوګانې، سندونه او شهادتونه د دې ښکارندويي کوي، چې امريکايي شکله ډيموکراسي د سياستوالو تر منځ د سيالۍ وسيله ګرځيدلې ده.
‎د امريکې د لويو ګوندونو ترمنځ سیالۍ د تېر کال د کيپيټل هيل کړکېچ د پلټنې له پيل د ګواهۍ اورېدلو غونډو پورې روانې وې.
‎د امريکا استازو مجلس چې د ډيموکرات ګوند پکې اکثريت دی، پلټنې پيل کړي او د ګواهۍ اوريدلو مالومات يې خپاري کړي او د جمهوري غوښتونکي ګوند د څارونکې کميټې پر غړو يې انتقاد کړی، چې د ګواهۍ اوريدلو غونډې له لارې يې تضادونه پټ ساتلي دي.
‎د امريکې د دوو ګوندونو ملاتړې خبري رسنۍ هم په دوو قطبونو کې پاتې وې، چې اوس د چا او کوم لوري مخه ونيسي.
‎د سي اېن اېن په شمول د ازادې ډلې خبري رسنيو يادو دوو غونډو ته په ژوندۍ بڼه پوښښ ورکړی او ژورې تبصرې يې پرې کړي، خو د محافظه کارې ډلې خبري رسنيو او فوکس ټلويزيون نه يوازې د ګواهي اوريدلو لومړۍ غونډه په ژوندې بڼه خپره نه کړه، بلکې هممهاله يې پر وړاندې د غونډې ضد پروګرامونه پېل کړل.
‎په امريکا کې روان کال پارلماني ټاکنې کيږي
‎د امريکا ډيموکرات ګوند او جمهوري غوښتونکی ګوند د ګواهۍ اوريدلو غونډو په هکله مختلفې رويې لري او هر ګوند هڅه کوي، چې پارلماني ټاکنو ته کمپاين وکړي.
‎په حقيقت کې  په يادو غونډو کې بايد د کيپيټل هيل د کړکېچ تر شا حقيقتونه او رښتيا موندلي شوي وای، خو دواړه ګوندونه په خپلمنځي سیاليو بوخت دي او ډرامه يې پېل کړې ده.
‎داسې ښکاري، چې د امريکا د سياسي ډلو قطب ايز حالت ډېر سخت شوی او د دغه هېواد د خلکو نظريې هم  یو له  بل سره په  ټکر کې واقع  شوې دي.
‎د سي اېن اېن د تازه سروې ۴۵سلنه ګډونوال په دې نظر دي، چې ډونالډ ټرمپ د ياد کړکېچ  مسئوليت پر غاړه لري، خو ۵۵ سلنه یې بيا په دې اند دي، چې ډونالډ ټرمپ ته د مسئوليت لږه ګوته نيول کيږي او په ټوله کې هغه ګرم نه دی.
‎د امريکا په ټولنو کې بېلا بېل تضادونه راپورته شوي، سیاستوال يې نه غواړي، چې ستونزې له بېخه حل کړي، خو د اقتصادي پرمختګ، د ډزو د کنټرول قانون په شمول د ځينو مسئلو په هکله په سياليو بوخت دي، چې له امله يې د امريکايانو ترمنځ تضادونه ورځ په ورځ زياتيږي.
‎ډيموکراسي يوازې شعار نه دی، بلکې سیاستوال يې بايد په عمل کې ثابته کړي او شته مسئلې حل کړي.
‎که امريکايي سياستوال په خپلې ډيموکراسۍ کې د کرونا وبا مخه نه شي نيولی، د پيسو پړسوب نه شي حل کولی، د ډزو پېښې نه شي کنټرولولی او د خلکو غوښتنو ته ځواب نه شي ويلی، نو  بیا داسې ډيموکراسۍ ته څه اړتيا ده؟
‎په ډيموکراسۍ کې باید د خلکو ستونزو ته پوره رسیده ګي وشي.
‎که د امريکا د دوو ګوندونو ترمنځ سيالي نور هم زور واخلي او کورنۍ مسئلې يې سختې شی، نو امريکايي شکله ډيموکراسي به له کړنګونو ګوزار شي.