د چین، افغانستان او پاکستان د بهرنیو چارو وزیرانو شپږم ډیالوګ د اګست په ۲۰مه نېټه په کابل کې ترسره شو.
په دې ډیالوک کې د چین د بهرنیو چارو وزیر وانګ يي، د افغانستان د بهرنیو چارو وزیر ملا امیرخان متقي او د پاکستان د بهرنیو چارو وزیر محمداسحاق ډار ګډون وکړ.
وانګ يي وویل، د درېیو هېوادونو د خارجه وزیرانو د ډیالوګ میکانیزم په رڼا کې يې د متقابل درناوي، مساواتو پر اساس ولاړې مشورې او ګډو ګټو اصول مراعات کړی، د سیاست، پرمختګ او امنیت په برخو کې يې خپلمنځي همکارۍ هڅولې او په سیمه کې يې د امن د تامین لپاره هڅې کړې دي .
وانګ يي زیاته کړه، اوس نړیوال وضعیت ترینګلی دی، چین غواړي له افغانستان او پاکستان سره ښه ګاونديتوب او سیاسي باور پیاوړی کړي، د بهرنیو له لاسوهنې سره کلک مخالفت کوي او د مختلفو کچو تګ راتګ د زیاتولو هڅې کوي.
ده زیاته کړه چې چین له دې ملاتړ کوي چې د افغانستان او پاکستان ترمنځ اړیکې ښې شي، د مشورو له لارې توپیرونه حل شي تر څو د درېیو خواوو همکارۍ نورې اوږدې شي.
متقی او ډار د چین، افغانستان او پاکستان د خارجه وزیرانو د ډیالوګ ستاینه وکړه.
امیر خان متقی وویل، اوس د نړۍ او سیمې حالات د ستر بدلون په حال کې دي، افغانستان په دې تمه دی چې د سږني ډیالوګ پر مټ له چین او پاکستان سره دوستانه اړیکې ټینګې کړي، خپلمنځي مشورې او همکارۍ نورې پياوړې کړي.
د پاکستان د بهرنیو چارو وزیر اسحاق ډار وویل، د درېیو هېوادونو د همکاري ستر بالقوه ځواک لري. ده زیاته کړه چې پاکستان د افغانستان د ګاوندي په توګه غواړي د افغانستان د سوله ییز جریان او د افغانانو ژوند د ښه والي لپاره خدمتونه وکړي.
درېیو خواوو موافقه کړې چې د ډیالوګ میکانیزم پر مټ په مختلفو برخو کې راکړې ورکړې او همکارۍ نورې ژورې کړي او په ګډه د سیمې سوله، ثبات او سمسورتیا وهڅوي.
