د چين د شاان شي ولایت په ليانګ جياهه کلي کې يوه داسې حاصل خیزه کرونده شته، چې له تېرو ۵۰ کلونو راهیسې ترې ځايي اوسېدونکي ګټه اخلي.
شي جين پينګ په ۱۹۷۴م کال کې، چې هغه مهال تنکی ځوان و، په ليانګ جياهه کلي کې د چين د کمونېست ګوند غړيتوب ترلاسه کړ او څه موده وروسته په همدې کلي کې د ګوندي څانګې منشي شو.
هغه مهال د ليانګ جياهه کلي شاوخوا ډېره ځمکه للمه وه او اوبه یې نه درلودې. بزګرانو د کرکيلې پر مهال ډېر کوښښونه کول، خو حاصلات به يې ډېر کم او عوايد به یې په نشت برابر وو.
شي جین پينګ د ګوندي څانګې د منشيتوب د ماموريت له پيل وروسته په ياد کلي کې د کليوالو په مشرۍ يو چيک بند جوړ کړ. نوموړي همغه مهال وويل: ((که چېرې دلته چیک بند جوړ شي، نو ځمکه به حاصل خیزه او له ګټو به يې د ليانګ جياهه کلي راتلونکي نسلونه هم برخمن شي. نو مونږ باید په هر صورت کې دا کار وکړو!))
شي جين پينګ د خلکو په ستونزو پوه و، ځکه په کلي کې اوسیده او د دوی ستونزې يې درک کړې وې. هغه دروند مسئوليت پر غاړه اخيستی و او د کليوالو په لارښوونې يې په کلي کې څاګانې، چيک بندونه، پټه داره کرنيز پټي او د متان ګاز ذخېرې جوړې کړې.
کليوالو په لومړيو کې د تولید اوسپنیزې وسیلې هم نه درلودې، خو شي جين پينګ د دغه کلي پښان (اهنګران) راغونډ کړل او د اوسپنيزو وسیلو د جوړولو کارخانه یې ورته تاسیس کړه، څو کليوالو ته اوسپنيزې وسيلې جوړې او هم يې ورته ترمیم کړي. په دغه کلي کې دکان هم نه و، نو کليوال به یې د ورځني ژوند د اړينو توکو د اخيستلو لپاره ډېر لرې بازار ته تلل. شي جين پينګ وروسته د کليوالو په مرسته په دغه کلي کې يو دکان هم پرانيست.
په دغه کلي کې ټوکر ډېر کم وو او خلکو به په لاسونو جامې جوړولې او ډېر وخت به یې پرې تېراوه.
شي جين پينګ د دغه کلي هغه ښځې، چې ګنډنه يې کولی شوه، راغونډې کړې او د جامو کنډلو خیاطي يې ورته جوړه کړه، څو کليوال ترې په کمو پيسو او کم وخت کې جامې واخلي……
شي جين پينګ په ليان جياهه کلي کې اوه کاله تېر کړل او پدې موده کې يې د کليوالو لپاره ډېر ښه کارونه ترسره کړل.
شي جين بينګ (د ۱۹۸۲م کال له مارچ څخه د ۱۹۸۵م کال تر مې پورې) د هه بې ولایت د جنګدينګ ولسوالۍ د ګوندي کمېټې مرستيال منشي او ورپسې د منشي په توګه دنده ترسره کړه او درې کاله يې په همدې ولسوالۍ کې کار وکړ.
هغه د دغه وخت د يادولو په ترڅ کې وويل: ((ما په ۱۹۸۲م کال غوښتل چې مرکزي ادارې پرېږدم او ريښيزې څانګې او خلکو ته ورشم. زه له ولس سره داسې مينه لرم، لکه څنګه چې له خپل پلار او مور سره مينه لرم.))
( عکس: شي جین پينګ په ۱۹۸۳م کال کې، چې هغه مهال یې د جنګدينګ ولسوالۍ د ګوندي کمېټې د منشي په توګه دنده ترسره کوله، د سړک غاړې کې له خلکو سره ولیدل او د هغوی نظرونه يې واورېدل.)
شي جین پینګ په بېلا بېلو ځايونو کې مختلفې دندې ترسره کړې دي. د هغه دندې، چې هرڅنګه بدلېدې، یعنې دنده یې لوړېده او يا ټيټېده، خو په زړه کې به یې تل خلکو ته لومړيتوب ورکاوه.
هغه يوه ورځ په سوړ ژمي کې په تای هانګ غره کې د کليوالو کورونو ته ورغی او د هغوی د حال احول پوښتنه يې وکړه او داسې یې تشویق کړل: (( که تاسو پوره باور ولرئ، نو للمې ځمکې هم په سرو زرو بدلولی شئ)).
هغه په وولينګ غرنیزه سيمه کې د کليوالو د حال احول پوښتنې پر مهال يوه سپينږیري ته وویل: (( زه د خلکو خدمتګار يم.)) هغه په همدې غرنيزې سيمې کې په درېيو ډولو ترافيکي وسیلو کې يوه بل کلي ته ورسيد او هلته يې د ځايي بېوزلو کلیوالو د حال احول پوښتنه وکړه او ورته يې وويل: ((مونږ باید د هغو سیمو خلک هير نه کړو، چې هلته کمونېست ګوند سخت او اوږدمهاله انقلاب کړی و……))
له ۲۰۱۲م کال راهیسې، کله چې د چين د واکمن کمونېست ګوند ۱۸م ملي کانګرېس ترسره شو، شي جين پينګ له ۱۴ خورا بېوزلو سيمو څخه ليدنه کړې او د بېوزلۍ د کمولو د کارونو په اړه يې شاوخوا ۵۰ ځلې څېړنې کړې دي.
شي جين پينګ هميشه داسې وايي: (( څو چې کلیوال وګړي له بېوزلۍ څخه ونه وځي، زه به يوه ورځ هم ارام ونه کړم.))، ((زه ډېر اندیښمن یم، که کار ښه ترسره نه کړم، نو بالاخره خلکو او تاریخ ته به په ځواب ویلو کې پاتې راشم.))
په چين کې نږدې ۱۰۰ ميليونه نفوس له بېوزلۍ څخه وتلی او نسبتاً شتمنه ټولنه یې جوړه شوې ده او دغه راز په دغه هېواد کې د نړۍ تر ټولو لوی تعليمي سیسټم، د ټولنيز ضمانت سیسټم، طبي سیسټم او د ښاري سيمو د کورونو سیسټم جوړ شوي او د خلکو ژوند کې يې د پام وړ ښه والی راغلی دی. دا هر څه د شي جين پينګ په مرکزيت او د چين د کمونېست ګوند د مرکزي کمېټې تر پیاوړې لارښوونې لاندې ترسره شوي دي.
( عکس: د ۲۰۲۱م کال د سپتمبر ۱۳مه نېټه، شي جین بينګ د شاان شي ولایت په يوه کلي کې د فصل حالت ګوري او له بزګرانو سره پرې خبرې کوي.)
شي جین پینګ وايي: (( د چین کمونېست ګوند تېر سل کلن مزل په اسانۍ نه دی وهلی. دغه ګوند د خلکو لپاره جوړ شوی دی. خلک د هېواد دي او هېواد د خلکو دی. کمونېست ګوند د واکمنۍ لپاره مبارزه وکړه او د هېواد د ښې حکومتولۍ لپاره هڅې کوي، هدف يې څه دی؟ هدف يې د خلکو ملاتړ دی.))
د چين د ټولنيز او اقتصادي پرمختګ ۱۵م پنځه کلن پلان کې د خلکو ګټو ته ډېر مهم ځای ورکړل شوی دی. په دغه پلان کې د پنځو برخو ۲۰ مهمې موخې ټاکل شوي، چې اوه موخې يې د خلکو په ژوند پسې تړاو لري او کارموندنه، عايدات، زده کړې، روغتيا او د ماشومانو او زړو کسانو طبي بيمې هم پکې شاملې دي.
۲۰۲۶م کال د ياد پلان پيلامه او د چين د کمونېست ګوند د جوړېدو ۱۰۵مه کليزه ده.
شي جین پينګ د روان کال په جنورۍ کې د ولایتي مشرانو او چارواکو يوه روزنيز کورس ته په وينا کې له هغوی څخه وغوښتل، چې د سياسي لاسته راوړنو په اړه سمې پېژندنې ولري او عملي يې کړي، څو خلکو ته رښتينې رفاه جوړه او د خلکو له لوري تائيد شي.
((د دې لوی هېواد لپاره مسؤلیتونه ډېر درانه او دندې ډېرې سختې دي. زه به له ځانه تېر شم، خو د خلکو هيلې به مړاوې نه کړم. زه د بې ځانۍ حالت ته تيار يم او د چين د پرمختګ لپاره به ځان وقف کړم.))
د شي جین پینګ دا زړه راښکونکې خبرې د نوموړي صمیميت او صادقانه احساسات منعکسوي او هم پکې د خلکو د خدمت لپاره د یوې پیړۍ عمر لرونکي ګوند ژمنتيا ښکاري!
