د پکتیا حوزوي روغتون له ۱۵۰ څخه ۳۰۰ بسترونو ته ارتقا کوي

د پکتیا عامې روغتیا ریاست مسوولین وايي، په دغه ولایت کې د اوسني ۱۵۰ بستر پر ځای به حوزوي روغتون ۳۰۰ بستریز شي. د نوموړي په خبره له دې سره به د ناروغانو ګڼه ګوڼه کمه او خدمات به یې پراخ شي. د پکتیا حوزوي روغتون په پنځو لویو برخو عمومي داخله، عمومي جراحي، نسایي ولادي، د ماشومانو څانګه، عقلي عصبي او نیروسرجري کې د ۴۱۵ کارکوونکو پر مټ خدمات وړاندې کوي. د یاد روغتون مسوولین وايي، تېر کال دوی ته شاوخوا ۳۷۳ زره ناروغانو مراجعه کړې، چې له جملې یې لوی او کوچني عملیاتونه، ولادتونه، عقلي عصبي او ځینو نورو برخو کې خدمات ترسره کړي دي.