یو شمیر دیني عالمانو کابل کې د یوې لویې غونډې په ترڅ کې پرحکومت نیوکه وکړه چې په لوی لاس غواړي دیني عالمان له حکومتدارۍ او په ټوله کې له نظام څخه لرې وساتي. دوی پرحکومت نیوکه وکړه چې په لوی لاس غواړي دیني عالمان له حکومتدارۍ او په ټوله کې له نظام څخه لرې وساتي. دیني عالم مولوي عبدالفتاح ابراهیمي په خپلو خبرو کې ټینګار وکړ چې د حکومت په رهبرۍ کې دې علماوو ته ونډه ورکړل شي او حکومت دې د سولې په مخکې خنډونه نه جوړوي. د ولسي جرګې پخوانی وکیل حاجي خیال محمد حسیني وویل، چې حکومت دې په هغه کسانو ډېره اتکاء نه کوي چې له هېواد څخه بهر لوى شوي دي او یا یې مېرمنې بهرنۍ دي. د نوموړي په وینا، دغه کسان نه د ملک په نبض خبر دي او نه یې په اړتیاوو، هغه څوک دې په حکومت کې په دندو وګمارل شي چې د دې ملت لپاره یې قرباني ورکړې وي نه دا چې له بهر نه رالېږل شوي وي.
