کریم خلیلي: طالبان پخوا لا خبرو ته تیار وو، ولسمشر غني چمتوالی نه لاره

د سولې عالي شورا پخواني مشر کریم خلیلي نن په کابل کې یوې غونډې ته ویلي چې د سولې لپاره رامنځته شوی فرصت باید ضایع نه شي. نوموړي د عاشورا په مناسبت جوړې شوې غونډې ته ویلي، کله چې دی د سولې شورا مشر و په خپله یې د طالبانو مشر هبت الله اخندزاده ته لیک استولی او د لیک ځواب هم تر لاسه کړی و. نوموړي ویلي، د طالبانو یو مذاکراتي پلاوي په هلمند ولایت کې له دوی سره مخامخ خبرو ته چمتوالی هم وښود خو په خبره یې ولسمشر غني ورته ویلي چې اوسمهال مذاکراتو ته هیڅ ډول تیاری نه لري. خلیلي دغه راز زیاته کړې چې دوی د خپل کار موده کې درې ځلې په بلګراد کې له طالبانو سره د تاوتریخوالي کمیدو په اړه ناسته وکړه او ولسمشر غني هم په انلاین ډول له دوی سره خبرې وکړي، خو په وینا یې ولسمشر له یادو فرصتونو ګټه پورته نه کړه.