نړيوالو د نوي چين د جوړېدو د ۷۵مې کليزې په درشل کې دا احساس کړې، چې دغه هېواد د عصري کېدو خپله لاره موندلې ده. چين پخوا يو بېوزله او کمزوری هېواد و او له ۷۵ کلونو راهيسې له وروسته پاتې حالت څخه د پرمختګ په لوري ګامونه اخلي او د اقتصاد د چټک پرمختګ او د ټولنې د دايمي ثبات دوه لوی نوښتونه يې کړي دي.
چين اوسمهال د چيني شکله عصري کېدو له لارې د پياوړي هېواد د ابادۍ او د ملت د بيا سمسورتيا لپاره هڅې کوي.نړيوال څېړونکي د چين چارې څاري او ارزيابي کوي يې، چې دغه هېواد به څنګه چيني شکله عصري کېدل وهڅوي او نړۍ ته به کوم نوي فرصتونه ورسوي؟
د چين دولت رئيس شي جين پينګ د چين ولسي جمهوريت د جوړېدو د ۷۵مې کليزې په لمانځغونډې کې ګډون او وينا کړې او يادو پوښتنو ته يې ځوابونه ويلي دي. نوموړي ويلي، د چين حکومت او هېوادوال باید د کمونېست ګوند پر عمومي لارښوونې ټينګار ولري، د ځانګړي سوسياليزم پر لارې باید ګامونه واخلي، د خلکو پر ارادې باید تمرکز وکړي او د سوله ييز پرمختګ پر لارې باید ټينګار ولري.
د نوموړي په خبرو کې ياد څلور ټکي د چين د کمونېست ګوند په شلم ملي کانګرېس کې هم وړاندې شوي، چې د چيني شکله عصري کېدو له ځانګړتياوو او اصلي غوښتنو سره سمون لري او په دغو ټکو کې نه يوازې پخوانۍ تجربې پرتې دي، بلکې د راتلونکي پرمختګ او د چيني شکله عصري کېدو لوري هم پکې روښانه دي. مونږ بايد راتلونکې ته وګورو او پخوانۍ تجربې باید راغونډې او ګټه ترې پورته کړو. د ملګرو ملتونو سرمنشي انټونيو ګوټرېش په یوې ارزيابۍ کې ويلي، چې چين د نړۍ د سولې او پرمختګ د هڅونې لپاره اړين او باوري ځواک ګرځيدلی دی او چيني شکله عصري کېدو له ۷۵ کلونو راهيسې نه يوازې د چين پرمختګ ته وده ورکړې، بلکې د نړۍ د سولې او ثبات او د انسانانو د پرمختګ لپاره يې هم رغنده خدمتونه کړي دي.
د چين حکومت د نوي چين له جوړېدو څخه د شلمې پيړۍ د ۷مې لسیزې تر پايه پورې صنعتي او د ملي اقتصاد سيسټمونه جوړ کړي او د چيني شکله عصري کېدو د ابادۍ لپاره يې ټينګ مادي بنسټونه ايښي دي. په ورته وخت کې، چين په سوله کې د ګډ ژوند پنځه اصول وړاندې کړي، چې اوس د نړيوالو اړيکو بنسټيز اصول او د نړيوالو قوانينو بنسټيز اصول ګرځيدلي دي.
چيني شکله عصري کېدو بهير له ۱۹۷۸م کال يعنې له اصلاحاتو او ورخلاصون وروسته نوې بڼه ښودلې او په ۲۰۰۱م کال کې د سوداګرۍ په نړيوال سازمان کې د چين له ګډون وروسته د نړيوال کېدو په چارو کې يې مهم ځواک ښودلی دی. د چيني شکله عصري کېدو چارې په ۲۰۱۲م کال کې د چين د کمونېست ګوند له اتلسم ملي کانګرېس وروسته ډېرې غوړېدلي، د انسانانو د بېوزلۍ د له منځه وړلو نوښت يې رامنځته کړی او پر له پسې يې د لوړې سويې ورخلاصون هڅولی دی او دغه راز د انسانانو د ګډ برخليک ټولنې جوړولو نظريې يې هم پراخې اغېزې ښندلې دي.
اوسمهال په نړۍ کې داسې لوی بدلونونه روان دي، چې ساری يې په تېرې يوې پېړۍ کې نه دی لیدل شوی، جيپولټيکي سياست پکې سخت شوی او د اقتصاد د بيا احيا کېدو ځواک یې کمزوری شوی دی او په ورته وخت کې، د ساينس او ټېکنالوژۍ نوی انقلاب او د صنعتي چارو بدلونونو د پرمختګ نوي فرصتونه هم پکې رامنځته شوي دي.
نړۍ يوه سوله ييز او ارام چاپېريال او د ګډ پرمختګ نوي اېنجن ته اړتيا لري. د چيني شکله عصري کېدو بهير د پخوانيو برياليو تجربو پر بنسټ کولی شي نړۍ ته نوي فرصتونه برابر کړي. فرصتونه د سولې له نظريې څخه رامنځته کېږي. د چيني شکله عصري کېدو بهير د سوله ييز پرمختګ د عصري کېدو په مانا دی او د نړۍ د سولې او ثبات لپاره فعال رول لوبوي.
چين د نړۍ يوازينی هېواد دی، چې سوله ييز پرمختګ ته یې په اساسي قانون کې ځای ورکړی او هم په پنځو اټومي وسلو لرونکو هېوادونو کې يوازينی هېواد دی، چې لومړی يې د اټومي وسلو د نه کارولو ژمنه کړې ده. چين د نړيوالې سولې لپاره د همغږۍ کارونه ترسره کوي او په راتلونکې کې به د سولې، پرمختګ، همکارۍ او ګډو ګټو پر لوري دوامدار ګامونه واخلي او د نړۍ د سولې، ارامتيا او د خلکو د ګډ پرمختګ هڅونه به وکړي.
د سويس د کمونېست ګوند عمومي منشي ماسيميليانو اي رسنيو ته ويلي، چې د چين ډيپلوماتيکو لارو نړيوالې سولې ته پاکه هوا رسولې ده او چيني شکله عصري کېدل به د بېلا بېلو هېوادونو ګډ پرمختګ وهڅوي.
د چين د کمونېست ګوند د شلمې مرکزي کمېټې په درېيمې عمومي غونډې کې ويل شوي، چې دغه هېواد به د لوړې سويې د ورخلاصون ميکانيزم بشپړ کړي، د اقتصاد باکيفيته پرمختګ ته به وده ورکړي او د لوړې سويې د سوسياليستي بازار اقتصادي سيسټم به جوړ کړي.
شي جين پينګ پر دې ټينګار کړی، چې د هراړخيزو اصلاحاتو ژورتيا او ورخلاصون او د باکيفيته پرمختګ هڅول به نړۍ ته د لا پراخو همکاريو چانسونه او د چين د پرمختګ ځانګړې لاره به نړۍ ته لا زياتې تجربې برابرې کړي.
د چيني شکله عصري کېدو بهير له بهرنيو هېوادونو نه دی کاپی شوی، بلکې د چين ځانګړتياوې پکې نغښتې دي او باور دا دی، چې دغه لاره به د پرمختيايي هېوادونو د عصري کېدو لارې پراخې کړي او لا زياتو هېوادونو ته به دا جرئت ورکړي، چې خپلو حالاتو ته په کتو د پرمختګ ځانګړې لارې جوړې کړي.