د پاکستان له زندانونو تر اوسه ۴۲۰۰ افغان بندیان خوشې شوي

د پاکستان په کراچۍ ښار کې د افغانستان کونسلګري د سېند ایالت له زندانونو څخه د افغان کډوالو د خوشې کېدو د هڅو د دوام خبر ورکړی او ویلي دي چې تراوسه د دغه ایالت له زندانونو زرګونه افغان بندیان خوشې شوي او د خوشې کېدو وروسته افغانستان ته انتقال شوي دي. په کراچۍ کې د افغانستان سر کونسل سید عبدالجبار تخاري پر خپله ټویټر پاڼه په یو ویډیوي پیغام کې ویلي چې د دغې کونسلګرۍ د هڅو په ترڅ کې پرون هم د یوې ښځې او اوو ماشومانو په ګډون ۱۱ افغان کډوال د دغه ایالت له یو زندان څخه خوشې شوي او د چمن – سپین بولدک له لارې افغانستان ته انتقال شوي دي. هغه ویلي، د دې دمخه هم د ښځو او ماشومانو په ګډون څلورو زره او ۲۵۸ تنه بندیان د سېند ایالت له مختلفو زندانونو څخه خوشې شوي او هېواد ته انتقال شوي دي.