کندوز کې ۳۲۴ کورنیو ته د څښاک پاکې اوبه برابریږي

د کندوز د کلیو بیارغونې او پراختیا ریاست له لوري او د اروپایي ټولنې( ایکو) په مالي ملاتړ د دغه ولایت د امام صاحب ولسوالۍ په قطغن قرسي افغانیه کلي کې د څه باندې ۷ میلیونه افغانیو په لګښت د اوبو رسولو یوې شبکې د جوړولو چارې پیل شوې دي. د یاد ولایت د کلیو د بیا رغونې او پراختیا ریاست مطبوعاتي مسوول حامد خان مهمند ویلي، چې دغه شبکه د ایکو موسسې په مالي ملاتړ جوړېږي چې پر مټ به یې د دغه کلي ۳۲۴ کورنیو ته د څښاک اوبه برابرې شي. نوموړي زیاته کړه، چې په دغه پروژه کې د سیمې یو شمېر اوسېدونکو ته د ۵ میاشتو لپاره د کار زمینه هم برابره شوې ده. د سیمې اوسېدونکو د دې پروژې د پیل هرکلی کړی او له دولت څخه یې د ورته نورو پروژو د پلي کېدو غوښتنه کړې ده.