د افغانستان او پاکستان د ۱۹ کلنو کم عمره کرکټ ملي لوبډلې د درې اړخیزې لوبلړۍ په پایلوبه کې نن ۱۰ بجې د یو بل پروړاندې سیالي ترسره کوي. دا په داسې حال کې ده، چې د افغان لوبډلې د یادې لوبلړۍ په لومړۍ لوبه کې پاکستانۍ لوبډلې ته په ستر توپیر ماتې هم ورکړې وه، ورپسې دوه ځلې یې اماراتو ته ماتې ورکړه او یوازې یوه لوبه کې یې بیرته له پاکستانۍ لوبډلې ماتې منلې وه. د یادولو وړ ده چې دغه سیالۍ د ۱۹ کلنو اسیا جام سیالیو ته د چمتو والي په موخه ترسره کیږي. افغان لوبډله به راتلونکې جمعه د روانې لیندې میاشت پر ۹مه د ۱۹ کلنو اسیا جام سیالیو کې خپله لومړۍ لوبه د بنګلهدېش پر وړاندې ترسره کړي.
