د چين د اکمالاتي ځنځير دويم نړیوال نندارتون کې، چې اوسمهال په بېجينګ کې روان دی، د لوړ معيار نږدې ۸۰ پېرېدونکو پلاويو ګډون کړی دی، چې دغه شمېر د تېر کال د همدې نندارتون د ورته شمېر په پرتله ډېر زیاتوالی ښيي.
د نندارتون ګډونوالو باور ښودلی، چې چين د اکمالاتي ځنځير په برخه کې نړيوالو پرانيستو همکاریو ته نوي فرصتونه برابر کړي دي.
په سږني نندارتون کې د ۶۹ هېوادونو، سيمو او نړيوالو سازمانونو ۶۲۰ تصديو او ارګانونو ګډون کړی او د ګډونوالو تصديو، سوداګرو او نندارچيانو شمېر يې د تېر کال د نندارتون د ورته شمېر په پرتله ډېروالی ښيي.
د دغه نندارتون مقدماتي لوري د نندارتون له پيل مخکې د ګډونوالو تصديو ته د توکو اخيستونکو د تقاضا په اړه معلومات او نندارچيانو ته د ګډونوالو تصديو د توليداتو په اړه معلومات ورکړي او د همدې مرستې په رڼا کې چيني او بهرنيو تصديو مخکې له مخکې خپل نوي همکاران پيدا کړي دي.
د چين د اکمالاتي ځنځير دويم نړيوال نندارتون د نومبر په ۲۶مې نېټې په پلازمېنې بېجينګ کې پرانيستل شوی، چې د همدې مياشتې تر ۳۰ مې نېټې پورې به دوام ولري.
