پسرلنی اختر د نوي کرنيز کال په لومړۍ ورځ پيلېږي او په وياړ یې په چين کې يوه اونۍ رخصتي وي.
دغه اختر د ختيځې اسیا په ډېرو هېوادونو کې لمانځل کېږي، خو په چين کې يې څپه تر نورو پورته او خلک يې راتلو ته شپې او ورځې شمېري. ډېری چينايان له خپلو مېنو يا ټاټوبو څخه لرې په نورو سیمو کې دندې ترسره کوي او پسرلني اختر ته ورځې او شپې شماري او هر وګړی یې هڅې کوي، چې دغه اختر له کورنۍ سره يو ځای ولمانځي.
پسرلنی اختر د چيني کولتور يوه نښه بلل کېږي، د چينايانو لپاره ډېر ارزښت لري او په ښه په جم او جوش یې لمانځي او اغېزه یې هم ډېره ژوره او پراخه وي.
پسرلنی اختر د ۲۰۲۴م کال د ډسمبر په ۴مې نېټې د ملګرو ملتونو د يونيسکو سازمان لخوا د غيرمادي کولتوري ميراثونو په نړيوال لېست کې هم شامل شوی دی. يوه احصايه ښيي، چې د کرنيزکال لومړۍ ورځ د نړۍ په نږدې شلو هېوادونو کې رخصت وي.
د روان ۲۰۲۵م کال د جنورۍ نهه ويشتمه نېټه د کرنيز مار کال له لومړۍ ورځې یا پسرلني اختر سره برابره ده. د چين حکومت او خلک په ښارونو او کليوالو سيمو کې د پسرلني اختر د هر کلي په پار په لویو ډګرونو، مارکيټونو او د سړکونو او لارو او کوڅو پر دواړو غاړو فانوسونه او ډېوې راځوړندوي.
د پسرلني اختر په راتلو سره په چين کې د خلکو د تګ راتګ لويه څپه پيلېږي، چې په چيني ژبې کې ورته چون یون(春运) وايي او دا د ځانګړي ټرانسپورټي پلان مانا لري.
چون یون (春运) د ځانګړي ټرانسپورټي پلان مانا لري او په ټولو تمځايونو کې د مساپرو ډېره ګڼه ګوڼه وي.
چون يون په چين کې د پسرلني اختر د ځانګړي ترافیکي پلان نوم دی، چې د هر کال د پسرلني اختر له را رسېدو ۱۵ورځې مخکې پيلېږي او ۴۰ ورځې دوام کوي. په دې څلوېښت ورځنۍ موده کې ګڼ شمېر خلک د اختر د لمانځنې لپاره خپلو کورونو ته ستنېږي او په ټول چين کې د خلکو د تګ راتګ خورا لويه څپه رامنځته کېږي، چې پيمانه يې په نړۍ کې تر ټولو لويه وي.
د پسرلني اختر په موده کې په ټول چين کې د سيلانۍ توده څپه روانه وي او دولت يې یوازې له سیلانۍ څخه سلګونه ميليونه ډالرعوايد ترلاسه کوي.
هر کال په چين کې د چون یون پرمهال د موټرونو، اورګاډو او الوتکو له لارې د خلکو د تګ راتګ عمومي شمېر سلګونو ميليونو ته رسېږي، خو سږنۍ څپه یې د تېرو په پرتله پراخه ده. په چين کې هغه کسان، چې له خپلو ټاټوبو څخه لرې په نورو ځايونو کې کارونه کوي، د پسرلني اختر له راتګ لسګونه ورځې مخکې هڅې کوي، چې ټيکټونه واخلي، ځکه د دغه اختر پر مهال ټرانسپورټ ډېر بوخت وي. د چين ټرانسپورټ وزارت ويلي، چې خلک به د سږني پسرلني اختر د چون يون پرمهال په بېلا بېلو ترافيکي وسايلو کې ۹ ميليارډه ځلې تګ راتګ وکړي او په دې جملې کې اتيا سلنه به یې په موټرونو کې تګ راتګ ولري.
چینايان د پسرلني اختر لپاره کوم ځانګړي توکي اخلي او کوم دودونه لري؟
پسرلنی اختر يا چون جيې (春节) د نوي کرنیز کال د پيل مانا لري. د چين د ښارونو په ګوټ ګوټ کې د پسرلني اختر د را رسیدو په پار ځانګړي بازارونه پرانيستي وي، چې په چيني ژبې کې ورته دا جي (ا大集) وايي او په پښتو کې ورته د سمسور بازار نوم کارولی شو.
دا جي (ا大集) يا د پسرلني اختر لوی یا سمسور بازار
د هرې کورنۍ غړي دا جي یا سمسور بازار ته ځي او هلته اختريز توکي اخلي او دغو توکو ته په چيني ژبه کې نيان هوه (年货) وايي.
د ساري په توګه، د چين ډېری وګړي د پسرلني اختر لپاره چون ليان (春联) اخلي او د کور پر دروازو یې لګوي. چون ليان یو ډول اوږده کاغذونه دي، چې شعري بيتونه او هنري نثرونه پرې ليکل شوي وي او چينايان يې د کور د دروازې پر غاړو سرېښوي او له همدې لارې ټولو دوستانو او ملګرو ته، چې د اختر په ورځو کې یو د بل کورونو ته ورځي، د نوي کرنيز کال مبارکي او نيکې هيلې وړاندې کوي.
چون ليان (春联) یو ډول اوږده کاغذونه دي، چې شعري بيتونه او هنري نثرونه پرې ليکل شوي وي او چينايان يې د کور د دروازې پر غاړو سرېښوي
ځيني یې هونګ باو (红包) اخلي. دا یو ډول سره کاغذي کڅوړه ده، چې په چيني ژبې کې ورته هونګ باو وايي. د کورنۍ مشران په دغو سرو کڅوړو کې پیسې اچوي او ماشومانو ته یې ډالۍ کوي او ځوانان بیا په همدغو کڅوړو کې مشرانو ته پیسې ورکوي او د نوي کال مبارکي او نيکې هيلې ورته څرګندوي.
ځيني چينايان د نوي کال په لومړۍ ورځ له سرېښناکو ورېجو د نيان ګاو(年糕) په نوم خواږه خواړه پخوي. په چيني ژبې کې نيان (年) د کال او ګاو (糕) د کېک معنا لري. يوه بله چيني کليمه، چې د ګاو تلفظ لري، د لوی يا جګ مانا لري، نو نيان ګاو خواړه په دې مانا هم دي، چې هر ژوندی موجود کال په کال لويېږي او هر څه کال په کال ښه کېږي. دوی دغه خواړه په همدې فال نيسي، چې ماشومان یې لوی او مشران یې ښه روغتيا او اوږد عمر ولري.