عبدالله: هېواد کې روان تاوتریخوالی هیچاته د منلو نه دی

د ملي مصالحې عالي شورا رییس وايي، دوحې ته د دښمنۍ ختمولو په هدف تللی و. نوموړي نن د سولې عالي شورا د پخواني مشر برهان الدین رباني د نهم تلین مراسمو کې وویل چې په افغانستان کې هره ورځ له ۵۰ څخه تر ۱۰۰ تنه وژل کیږي.چې په وینا یې دغه وضعیت د افغانستان د خلکو لپاره د منلو نه دی. هغه د حکومت او طالبانو ترمنځ د مذاکراتو پیلېدل د افغانستان د خلکو لپاره یو فرصت وباله. عبدالله وویل، که چیرې ځینې کسان فکر کوي چې د جګړې لپاره یو فرصت پیدا کیږي، په وینا یې دا د محاسبې اشتباه ده. چې د خدای او خلکو په وړاندې به مسوول وي. نوموړي وویل چې له طالبانو سره د حکومت کوونکی ټیم د افغانانو پراخ ملاتړ له ځان سره لري. نوموړي زیاته کړه چې یاد ټېم تېرو ورځو کې ګرم بحثونه کړي چې په وینا یې پایلو ته رسېدلي دي. عبدالله وویل چې افغان مرکچي پلاوی د افغانانو د تیرو کلونو له لاسته راوړنو څخه دفاع کوي.