بامیان ولایت ته د ولسمشر غني د سفر پر مهال په یاد ولایت کې جوړې شوې غونډې ته د احمد شاه بابا په اړه د ولسمشر د دویم مرستیال سرور دانش څرګندونې د ټولنیزو رسنیو د کاروونکو له توندو غبرګونونو سره مخ شوې دي. دانش په یاده ناسته کې د طالبانو استبداد ته په اشارې ویلي چې د طالبانو نظام د محمدزیو او سدوزیو له سلطنت سره د محتوا له اړخه هیڅ توپیر نه لري ځکه د ده په خبره، په هغه وخت کې هم یادو ډلو ۲۳۰ کاله په افغانستان دیکتاتورانه واکمني وکړه او طالبان هم ورته فکر لري. د نوموړي دې څرګندونو د ټولنیزو رسنیو کاروونکي سخت غوسه کړي او وایي چې د دانش سترګې تعصب ړندې کړې دي. هغوی د دویم مرستیال څرګندونې د بهرنیانو فرمایش بللی او زیاته کړې یې ده چې حکومت باید په دې اړه خپل دریځ روښانه او له ملت څخه بښنه وغواړي. د یادونې ده چې حکومت او دانش تر اوسه په دې اړه هیڅ غبرګون نه دی ښودلی.
