ولسشمر غني نن په ارګ کې د افغانستان لپاره د چین له ځانګړي استازي لیو جیان سره لیدلي دي. له ارګه خپرې شوې خبرپاڼه کې راغلي، ولسمشر غني په دې لیدنه کې د افغان سولې پروسه کې د چین رول ته په اشارې ویلي، طالبان باید له تاوتریخوالي لاس پر سر، اوربند ته غاړه کېږدي او دا ومني چې له نظامي لارې د ستونزې حل ته نه رسېږي. نوموړي د خپلو خبرو پر دوام د افغانستان او چین ترمنځ د دوه اړخیزو اړیکو پر پیاوړتیا د ټینګار ترڅنګ زیاته کړې، چې د تلپاتې سولې لپاره د سیمهییزې اجماع پیاوړتیا اړینه ده. خبرپاڼه کې راغلي، لیو په یاده لیدنه کې ویلي چې افغانستان ته یې د سفر موخه دا ده چې د وروستیو تحولاتو په اړه د افغان دولت نظر واوري. د چین ځانګړي استازي دغه راز د سولې روانو مذاکراتو ته په اشارې زیاته کړې چې افغان سوله حساس پړاو ته رسېدلې او چین په دې برخه کې د افغانستان له اقداماتو ملاتړ کوي. هغه ویلي، هېواد یې د افغان سولې، انکشاف او د سیمه ییزو همکاریو تګلارې ملاتړ کوي او هیله لري چې ټول اړخونه له دغه فرصت څخه سالمه ګټه پورته کړي.
