مولوي مطیع الحق خالص؛ د چاپېریالي پروژو د بیا پیل لپاره د هڅو غوښتنه کړې

د چاپېریال ساتنې ملي ادارې خبر ورکړی، چې د دغې ادارې عمومي رییس مولوي مطیع الحق خالص په سیمه‌ییزه او نړیواله کچه د چاپېریال ساتنې په برخه کې د همکاریو د پیاوړتیا په پار د Dialogue Action سازمان له اجراییوي رییس جولیان واینبرګ او مرستیال کمال اوکدا سره کتلي دي. په دې کتنه کې د اقلیمي بدلون، د افغانستان د ځنډول شویو چاپېریالي پروژو، په سیمه‌ییزه او نړیواله کچه د همکارۍ او همغږۍ د پیاوړتیا او پر مختلفو چاپېریالي مسایلو خبرې شوې. مولوي مطیع الحق خالص د Dialogue Action سازمان له مسولینو غوښتنه وکړه، چې په سیمه‌ییزه کچه د پرمختللو هېوادونو د تجربو شریکولو، تخنیکي همکارۍ، ظرفیت لوړونې، نړیوالو چاپېریالي غونډو او کنفرانسونو کې د افغان پلاوي د ګډون زمینې برابرول او د ځنډول شویو چاپېریالي پروژو د بیا پیل لپاره دې، هلې ځلې وکړي. د Dialogue Action مسولینو وویل، موږ به هڅې وکړو چې د چاپېریالي موضوعاتو او اقلیمي بدلون په برخه کې د نړیوالو ارګانونو او چاپېریال ساتنې ملي ادارې ترمنځ د همکارۍ او همغږۍ د لا پیاوړتیا لپاره مخکې قدمونه واخلو.