د سرپرست حکومت اداري مرستيال او مل پلاوي چين ته له رسېدو وروسته پرون ماسپښين د چین ولسي جمهوریت د ملي کنګرې دايمي کمېټې مرستيال وانګ دونګ مېنګ، د بهرنيو چارو وزارت مرستيال سون ويدونګ او د ياد هېواد له يو شمېر پانګهوالو سره په جلا جلا توګه کتلي دي. په دې کتنو کې د صنعت او سوداګرۍ وزیر نورالدين عزيزي او د بهرنيو چارو وزارت مرستيال ډاکتر محمد نعيم هم حضور درلود. وانګ دونګ مېنګ په بېلابېلو برخو کې د سرپرست حکومت د لاسته راوړنو يادونه کړې او ویلي یې دي، چې چين او افغانستان د دوو ښو ګاونډيو په توګه پخپل منځ کې هېڅ ستونزه نه لري او هيله يې ښودلې، چې دوه اړخیزه اړيکي تر بل هر وخت پراخې او پياوړې شي.
