د شینجیانګ د اویغور کورواکې سیمې د جوړېدو د ۷۰مې کلیزې لمانځغونډه د سپتمبر په ۲۵مه نېټه د دې سیمې په مرکز ارومچي ښار کې تر سره شوه. د چین کمونېست ګوند د مرکزي کمېټې عمومي منشي، دولت رئیس او د مرکزي پوځي کمیسیون مشر شي جين پينګ په دغه لمانځغونډه کې ګډون وکړ او دا ورځ يې د شینجیانګ د بېلا بېلو قومونو له وګړیو سره په ګډه ولمانځله.
شینجیانګ له لرغوني وخت راهیسې د چین یوه نه جلا کېدونکې برخه ده. د شینجیانګ د اویغور کورواکه سیمه په ۱۹۵۵ کال کې جوړه شوه، دا د دې سیمې د پرمختګ په تاریخ کې یوه لویه پېښه وه. شینجیانګ په تېرو ۷۰ کلونو کې د بېوزلۍ له منځه وړلو، پرانیستي توب او پرمختګ په برخو کې تاریخي لاسته راوړنې ګټلې دي. یاده لمانځغونډه د شينجيانګ د څار لپاره نړیوالو ته یوه مهمه کړکۍ برابروي.
د چین د دولتي شورا د پرمختیا د څېړنیز مرکز د قومي پرمختګ څېړونکي جیا چون یانګ وویل، د یادې لمانځغونډې په جوړېدو سره له ۷۰ کلونو راهیسې د شینجیانګ لخوا تر لاسه شوي تاریخي بریالیتوبونه ښودل شوي او دا ښکارندویې کوي چې په چین کې د قومي سیمې د کورواک اداري نظام ډېرې وړتیاوې لري او په نوې زمانه کې د شینجیانګ د مدیریت په اړه د کمونیست ګوند تګلارې اغېزمنې دي. د شینجیانګ د بېلا بېلو قومونو وګړي د چین کمونيست ګوند تر لارښوونې لاندې د خپل ټاټوبي د جوړولو په هکله پوره باور لري.
شینجیانګ په تېرو ۷۰ کلونو کې څه تاریخي بریالیتوبونه تر لاسه کړي دي؟
شمېرې ښيي، په ۱۹۵۵م کال کې د شینجیانګ د تولید عمومي ارزښت یو ملیارډ ۲۳۱ ملیونه یوانه و، تېر کال دغه شمېر له ۲ ټریلیونو یوانو زیات شوی چې د ۷۰ کاله د مخه په نسبت ۱۶۰۰ چنډه زیات شوی دی. د ۲۰۲۰م تر پایه پورې د شینجیانګ په کلیوالو سیمو کې ټول کسان له بېوزلۍ څخه ایستل شوي او شتمنه ټولنه یې جوړه کړې ده. تېر کال د ښارونو او ښارګوټو اوسېدونکو عواید د ۱۹۷۸م کال په نسبت سل چنده زیات شوي دي، تېر کال د شینجیانګ د اوسېدونکو منځنی عمر ۷۷ کاله و، خو لسګونه کاله مخکې دا رقم یوازې ۳۰ کاله و.
شینجیانګ تېر کال څه باندې ۳۰۰ ملیونه سیلانیان جلب کړي او د کورنیو او بهرنیو سیلانیانو ډېر د خوښۍ وړ تمځای ګرځېدلی دی.
ډېر هغه بهرني سیلانیان چې شینجیانګ ته راغلي له دې سیمې ژوره خاطره لري. د جرمني د یو پوهنتون د چینايي قانون او اقتصاد د څېړنیز مرکز مدیر ګه شیانګ لین وویل، هغه له شینجیانګ څخه تر سفر وروسته دا درک کړې چې د ځايي وګړیو د ژوند سویه څرګنده لوړه شوې، د خونديتوب احساس یې ډېر زیات شوی، ځايي کلتور هم په اغېزناک ډول ساتل او خپور شوی دی او دې کار دې سیمې د ټولنیز ثبات او اقتصادي پرمختګ لپاره مهم تضمین برابر کړی دی.
دا یو واقعیت دی چې د شینجیانګ ټول بریالیتوبونه د واکمن کمونيست ګوند تر لارښوونې لاندې تر لاسه شوي دي. په تېره بیا د چین کمونيست ګوند له اتلسم ملي کانګرس راهیسې، شي جين پينګ په نوې زمانه کې د شینجیانګ مدیریت په اړه یو لړ ستراتيژۍ وړاندې کړې او د شینجیانګ د ادارې لپاره یې بنسټ اېښی دی. د شینجیانګ د جوړېدو د ۷۰مې کلیزې په درشل کې دغې سیمې ته د شي جين پينګ سفر د شینجیانګ د راتلونکي پرمختګ لپاره لار نقشه ټاکلې ده یعنې شینجیانګ دې د عصري کېدو په نوې مرحله کې د خپلو وړتیا لرونکو چارو پر پرمختګ ټینګار وکړي، د نوي کیفیت توليدي ځواک ته دې پرمختګ ورکړي، د کلتور او سیلانۍ چارو یو ځايښت دې پياوړی کړي او د ایکولوژیکي سیستم ساتنه او ترمیم دې چټک کړي.
په تېرو ۷۰ کلونو کې د شینجیانګ د پرمختګ جریان دا ښودلې چې د وګړیو نیکمرغه ژوند د بشري حقونو تر ټولو لوی مسوولیت دی. باور لرو چې د شینجیانګ د بېلا بېلو قومونو وګړي به د انارو د دانو په شان خپل یووالی وساتي او د خپل ټاټوبي جوړونې لپاره به ګډو کوښښونو ته دوام ورکړي او د شینجیانګ اینده به لا روښانه کړي.