د اوبو او انرژۍ وزیر؛ د انرژۍ اونۍ په نړۍوال فورم کې د ګډون لپاره روسیې ته تللی

د اوبو او انرژۍ وزارت په خپره کړې خبر پاڼه کې ویلي، چې د دغه وزارت وزیر عبداللطیف منصور د روسیې د انرژۍ اوونۍ په نړۍوال فورم کې د ګډون لپاره روسیې ته په سفر تللی دی. د خبرپاڼې له‌مخې، عبداللطیف منصور به په یاد نړۍوال فورم کې له ګډون سربېره د انرژۍ او اوبو سکتورونو په برخو کې د متقابلو همکاریو د پراختیا، د تجربو د تبادلې او د افغانستان د انرژۍ سکتور د وړتیاوو د معرفي کولو په موخه د اړوندو هېوادونو له چارواکو سره هم وګوري. یاد وزارت دغه سفر مهم بللی، ځکه په خبره یې د انرژۍ نړۍوال فورم د سیمې او نړۍ د هېوادونو ترمنځ د همکارۍ، پانګونې او د انرژۍ د پراختیا په اړه د نظرونو د تبادلې مهم فرصت برابروي.