د چين او امريکا د مشرانو ترمنځ ملاقات د روان ۲۰۲۵ کال د اکتوبر په دېرشمه نېټه د کوريا جمهوريت په پوسان کې تر سره شول چې دغه ملاقاتو د نړیوالې ټولنې پام راخپل کړی دی. څرنګه چې چين او امريکا په نړۍ کې تر ټولو لوی اقتصادونه ګڼل کېږي، نو د دواړو هېوادونو د مشرانو ترمنځ ملاقات نه يوازې پر ځان بلکې پر نړۍ اغېزه کوي. خو د دواړو هېوادونو پر وړاندې تر ټولو لويه مسئله سوداګريزه ستونزه ده او نورې ستونزې په راتلونکي کې څنګه حل شي چې همدا د چين او امريکا ترمنځ د اړيکو پر ثابت پرمختګ پسې تړاو لري. د ګردې نړۍ لپاره که چين له امريکا سره همکارۍ وکړي، نو دا به نړۍ ته ګټې ورسوي. که يو له بل سره جګړه وکړي، نو دواړه خواوې به زیانمن کړي. په دې وجه نړيوالو دا هيله ښودلې چې چين له امريکا سره په سوله کې ګډ ژوند وکړي او د ګډو ګټو پر بنسټ برياليتوبونو ته د رسېدو لپاره ګډې هڅې وکړي، څو نړۍ ته مثبت ځواک راوړي.
ايا غوره دا ده چې چين او امريکا همکاران وي او يا دا چې دښمانان شي، چې دا د دواړو خواوو پر وړاندې لومړۍ مسئله ده او هم د دوه اړخيزو اړيکو پر ثابت پرمختګ پسې تړاو لري. په دې دوه ساعته ملاقاتو کې د چین د دولت رئيس شي جين پینګ يادې مسئلې ته ځواب ورکړی. چین او امریکا بايد همکاران او دوستان وي چې دا نه يوازې تاريخي تجربه بلکې واقعي اړتياوې هم دي.
د چين او امريکا ځانګړنې بېلې دي، نو خامخا د نظریو توپيرونه شته. د نړۍ د دوو لويو اقتصادونو په توګه د دواړو هېوادونو ترمنځ جنجالونه رامنځته کېږي چې دا هم يوه عادي چاره ده. خو په ورته مهال د چين او امریکا ترمنځ ګډې ګټې د تضادونو او توپيرونو په پرتله زياتې دي. له څو کلونو راهيسې دوه اړخيزې سوداګريزې او اقتصادي اړيکې د دوه اړخيزو اړيکو په برخه کې د یوه پل رول لوبولی او په دې سره يې د دواړو هېوادونو ګټې هم سره لا يو ځای شوې دي. همکارۍ د دواړو خواوو لپاره يوازينی سم انتخاب دی او هر ډول دښمني او مقاومت يوازې دواړو خواوو ته به زيانونه رسوي. لکه څنګه چې د رئیس شي جين پینګ ويلي و، د چين د پرمختيا او سمسورتيا موخه د ولسمشر ټرمپ هغې موخې ته ورته ده چې امريکا بيا ځواکمن او غښتلی هېواد شي. نو چين او امريکا د ګډې سمسورتيا او لاسته راوړنو د ترلاسه کولو لپاره ګډې هلې ځلې کولی شي.
له يوې مودې راپدېخوا امريکا د خپلې يادې موخې د تر سره کولو لپاره د سوداګريزو اړيکو د پرې کولو او د سوداګريزو خنډونو د جوړولو له لارې پر چين حداکثري فشارونه اچولي، څو د چین د پرمختګ مخه ونيسي. خو چين خپل ښه اقتصادي پرمختيایي حالت ساتلی او د روان کال په لومړيو درېيو ربعو کې يې پرمختيايي انډول په سلو کې پنځه اعشاريه دوه ښودلی دی. نو د چین اقتصاد انعطاف پذيره ښکاري او لويه پيمانه او پرمختیايي امکانات لري او نظام يې هم خپل غوره والی لري. په وروستيو کې د چين د کمونېست ګوند د شلمې مرکزي کمېټې په څلورمه عمومي غونډه کې د اقتصاد او ټولنيز پرمختګ د راتلونکي پنځه کلن پلان وړانديز تصويب شو او ۱۵ م پنځه کلن پلان هم پکې وټاکل شو. له څه باندې اوياوو کلونو راهيسې چين د خپلې نقشې له مخې پر خپلو اقداماتو ټینګار کړی او په دې لټه کې نه دی چې د چا پر وړاندې ننګونې جوړې کړي، بلکې پر خپلو چارو يې تمرکز کړی او له نورو هېوادونو سره يې پرمختيايي فرصتونه شريک کړي دي.
د چين د برياليتوب مهم راز دا دی چې د خپل پرمختګ ترڅنګ له نورو هېوادونو سره پرمختيايي ګټې شريکوي.
د چين او امریکا ترمنځ اړيکې په نړۍ کې داسې اړيکې دي چې بايد په ښه توګه پر مخ لاړې شي. چين او امریکا په جلا جلا توګه د نړۍ د تر ټولو لوی پرمختيايي او پرمختللي هېواد په توګه بايد خپل مسؤليت پر غاړه واخلي او په ګډه د دواړو هېوادونو او نړۍ په ګټه چارې ترسره کړي، څو د نړيوال اقتصادي پرمختګ او نړيوال اقتصادي مديريت د بشپړتيا لپاره خدمتونه وکړي.