هلمند کې پر ۲۱۳ جریبه ځمکه د انارو باغونه جوړیږي

هلمند کې د کرنې، اوبولګولو او مالدارۍ وزارت د ۱۲.۵ میلیونه افغانیو په لګښت د یوې سترې پراختیايي پروژې په لړ کې د ۲۱۳ بزګرانو لپاره د انارو د نويو باغونو جوړولو چارې پیل کړې چې موخه یې د بڼوالۍ معیاري کول، د اوبو سپما او د بزګرانو د تولیداتو لوړول دي. د کرنې ریاست چارواکو په وینا، دغه پروژه چې د وزارت د پراختیايي بودجې له لارې تمویلېږي، ۱۲.۵ میلیونه افغانۍ لګښت پرې راځي او په ۲۱۳ جریبه ځمکه کې به د انارو باغونه د عصري او مسلکي تخنیکونو په مرسته جوړ شي. دغه باغونه به د لښکرګاه، کجکي، خانشین، موسی قلعه او نهرسراج په ولسوالیو کې جوړېږي.