د چين دولت رئيس شي جين پینګ د نومبر په ۲۵مې نېټې د چین او روسيې د انرژۍ اووم سوداګريز فورم ته د مبارکۍ پيغام لېږلی، چې د دواړو هېوادونو د بېلا بېلو ټولنو پاملرنه يې راجلب کړې ده.
دوی د رئیس شي جين پينګ د مبارکۍ په پیغام کې د چين او روسيې د اقتصادي او ټولنيز پرمختګ او د خلکو د نيکمرغۍ لپاره د دواړو هېوادونو د انرژۍ د همکاريو لوړه ارزونه کړې او اکثرو یې ويلي، چې په ياد پيغام کې د دواړو هېوادونو تصديو ته د همکاريو لارښوونه شوې او د خپلمنځي هراړخيزو همکاريو د نوي جوړښت لپاره يې لوری روښانه کړی دی، چې دا به د انرژۍ نړيوال بازار ته ثبات ورکړي.
دغه ټولنې به د رئیس شي د مبارکۍ پيغام کې ورکړل شوې روحيه پلې کړي او د انرژۍ په هراړخيزو همکاريو کې به د دوه اړخيزو اړيکو لا ټينګښت ته ادامه ورکړي، څو دواړه هېوادونه او خلک ترې برخمن شي.
د چين او روسيې ترمنځ د انرژۍ سوداګريز فورم د دواړو هېوادونو د وړانديز له مخې جوړ شوی، مشرانو يې ورته پاملرنه کړې او د فورم د چارو لارښوونه يې کړې ده.
د معلوماتو له مخې، د روسيې ولسمشر ولاديمير پوتين هم په همدې ورځ ياد فورم ته د مبارکۍ پیغام لېږلی دی.
د روسيې د انرژۍ د پرمختیایي ستراتيژۍ او بيولوژیکي خونديتوب د کمېټې سرمنشي او د دغه هېواد د نفتو شرکت عمومي مدير اګور اوانویچ سيچن د دواړو هېوادونو له مشرانو څخه د زړه له کومي مننه کړې او ويلي يې دي، چې دغو مشرانو هميشه د انرژۍ په دوه اړخيزو همکاريو کې پر موجودو ستونزو او مسئلو تمرکز کړی دی.
رئیس شي جين پینګ ډېر مخکې پر دې ټینګار کړی چې هر هېواد باید د انرژۍ د کنټرول حق ولري. چين اوس د بيا کارېدونکې انرژۍ داسې سيسټم جوړ کړی چې تر نورو مخکښ او پرمختیايي سرعت يې ډېر چټک دی او د نوې انرژۍ تر ټولو بشپړ صنعتي ځنځير لري.
چين د نړۍ يو داسې هېواد دی چې د انرژۍ مصرفي سرعت یې په چټکۍ را ټيټ شوی دی.
د انرژۍ په برخه کې د چين او روسيې د همکاريو ژورتيا نه يوازې دغو هېوادونو ته ګټې رسوي، بلکې د انرژۍ نړيوال بازار لپاره هم ثابت عوامل برابروي او هم د انرژۍ د نړيوال امنيت د ساتلو او په دې برخه کې د نړيوال مديريتي سيسټم د لا بشپړتيا لپاره مهم رول لوبوي.
د روسيې د صدراعظم مرستيال اليکسندي نواک ويلي، چې د مشرانو د مبارکۍ يادو پيغامونو ټولو ته د دوه اړخيزو همکاريو پر ثابتې پياوړتيا باور ورکړی دی.
رئیس شي جين پينګ د مبارکۍ په پيغام کې ويلي، د انرژۍ په برخه کې د روسيې او چين ترمنځ همکارۍ ډېر مخکې پيل شوي، نو بنسټ يې ډېر ښه دی او د ګډو ګټو پر بنسټ د دوه اړخيزو همکاريو نمونه یې جوړه کړې ده.
دواړو هېوادونو د څو کچو هراړخيز ارتباطي ميکانيزم جوړ کړی، د انرژۍ د بېلا بېلو موضوعاتو په اړه یې د نظريو تبادلې او د پروژو د پرمخبېولو پياوړی ضمانت برابر کړی او د نفتو، ګازو، اټومي انرژۍ او بيا کارېدونکو انرژيو په څو برخو کې يې د همکاريو او پرمختګ لپاره کلک بنسټ ايښی دی.
د چين د انرژۍ ملي ادارې د نړیوالو همکاريو مشر وي شياو وي پر دې اند دی، چې رئيس شي جين پینګ د مبارکۍ په پيغام کې د چین او روسيې د انرژيو په همکاريو کې د لاسته راوړنو مثبته ارزونه کړې او په راتلونکې کې یې د دغو همکاريو لپاره لوری روښانه کړی دی.
چين به په نږدې راتلونکې کې د دغه پیغام روحيه پلې کړي، د روسيې په شمول له بېلا بېلو هېوادونو سره به د انرژيو همکارۍ لا پراخې کړي، د ورخلاصون له لارې به د انرژيو امنيت تضمين کړي او په دې برخه کې به د لا عادلانه، برابر او پراخ ګټور مديريتي سيسټم د ابادۍ لپاره هڅې وکړي.