سره له دې چې د بین الافغاني مذاکراتو له پیل نږدې دوې میاشتې تېرېږي، خو په دې موده کې تر سولې پر جګړه ډېر تمرکز دی او دواړه لوري تر مذاکراتو جګړه ډېره کوي. له دې ټولو سره سره، طالبان او حکومت د یو بل پر ضد سخت تبلیغات کوي او هڅه کوي یو بل د خونړیو بریدونو او پېښو مسوول وبولي. د سولې د برخې فعالین بیا وایي چې د حکومت او طالبانو دا چاره به د افغان ملت لپاره د جګړې د ختمولو رامنځ ته شوی فرصت ضایع کړي او خونړۍ پېښې به دوام کوي. نړیوالې ادارې هم وایي چې په وروستیو کې په افغانستان کې تاوتریخوالی ډېر شوی دی.
د بین الافغاني خبرو له پيل سره سم تمه دا وه چې په افغانستان کې به جګړې کمې شي او ژر تر ژره به یو دایمي اوربند رامنځ ته شي، خو هر څه برعکس شول، جګړې شدیدې شوې او د سولې خبرې خورا ټکنۍ مخ ته روانې دي. د سیګار د تازه راپور پر بنسټ، وسله والو طالبانو په وروستیو دریو میاشتو کې تاوتریخوالی ډېر کړی دی. دې ادارې په خپل یوه تازه راپور کې ادعا کړې چې طالبانو په وروستیو دریو میاشتو کې د دریو مخکینیو میاشتو په پرتله په تاوتریخوالي کې پنځوس سلنه ډېروالی راوستی دی. تر دې وړاندې د ملګرو ملتونو په ګډون نورو نړیوالو بنسټونو هم په افغانستان کې تاوتریخوالی د اندېښنې وړ ښودلی و او په وینا یې، اوسنۍ کچه یې بوږنوونکې ده.
یوازې دا نه دي، بلکې افغان حکومت او طالبان دواړه د دې پر ځای چې د سولې لپاره هڅې وکړي، د جګړې په تودولو بوخت دي او د یو بل پر ضد پراخ جنګي تبلیغات کوي. طالبان افغان حکومت د ملکي مرګ ژوبلې او هوايي بریدونو مسوول بولي، خو افغان حکومت بیا ټینګار کوي چې طالبانو تاوتریخوالی ډېر کړی او پر ښارونو یې بریدونه پيل کړي دي. تر ټولو وروستۍ پېښه پر کابل پوهنتون برید و، چې طالبانو پکې لاس لرل رد کړل، خو افغان حکومت یې د دې ډلې کار بولي.
د سولې د برخې فعالین بیا دا هر څه د اندېښنې وړ بولي او غوښتنه کوي چې دواړې خواوې دې له نرمښت کار واخلي او له داسې څرګندونو او اقداماتو دې ډډه وکړي چې هغه د بهرنیانو په ګټه وي او جګړې شدیدې کړي. پخوانی طالب چارواکی او د سولې د برخې فعال سید اکبر اغا وايي، د مذاکراتو په ټکني کولو او جګړو په شدت کې د بهرنیانو لاس دی او دوی نه غواړي چې افغانان ژر سولې ته سره ورسېږي. د ده په خبره: «یو مسوولیت بهرنیانو ته راجع دی، چې دوی قصداً موږ داسې یوې مرحلې ته رسولي یو. دوی غواړي وښيي چې په افغانانو کې د سولې استعداد نشته، دوی پخپلو کې نه دي جوړ، نو ځکه جګړې اوږدې شوې)).
نوموړی همدا راز وایي، که حکومت او طالبان په خپلو دريځونو کې نرمښت ونه ښيي، د یو بل پر ضد داسې څرګندونې وکړي چې د سولې روانه پروسه تخریب کړي، نو ښايي افغانان د سولې لپاره رامنځ ته شوی فرصت له لاسه ورکړي او لامل به یې هم د دواړو لورو اوسنی دريځ وي. هغه وايي: ((دواړه په دې وختو کې داسې څرګندونې کوي چې له سولې سره کومه مرسته نه شي کولی. یوازې دا پروسه به له خنډ سره مخ شي او داسې ښکاري چې فرصت د ضایع کېدو په حال کې دی)).
ځينې سیاسي جهتونه بیا وایي چې په حکومت کې د سولې اراده نشته ده، نو ځکه جګړې اوږدې دي او د سولې مذاکرات له خنډ سره مخ دي. د جمعیت اسلامي سرپرست صلاح الدین رباني په خپلو څرګندونو کې تور پورې کړی چې د افغان حکومت د ځينو چارواکو ګټې په جګړه کې دي، نو ځکه سوله له خنډونو سره مخ ده. هغه وايي: ((ځينو خو د دې وطن د ورانولو ماموریت اخیستی او د ځینو بیا ګټې په جګړه کې دي، ځکه نو په حکومت کې د سولې اراده نشته ده)).
د سولې د برخې فعال سید اکبر اغا بیا په دې باور دی چې طالبان او حکومت دې ملت ته د درېیمګړي په توګه مراجعه وکړي او د ملت له منځه دې هغو کسانو ته د سولې راوستو او منځګړي صلاحیت ورکړي چې خیرغوښتونکي وي او په هېڅ بهرني لوري پورې تړاو ونه لري.
