اوچا: کونړ کې درنې واورې د زلزله‌ځپلو خیمې ویجاړې کړې دي

د ملګرو ملتونو د بشري مرستو د همغږۍ دفتر (اوچا) راپور ورکړی، چې په کونړ ولایت کې درنې واورې د زلزله‌ځپلو خیمې ویجاړې کړې دي. په راپور کې ویل شوي، چې ژمي تر ټولو ډېر زیان د ټولنې اغېزمنو ته رسولی او په خبره یې روغتیايي مرکزونو ته هم لاسرسی محدود شوی دی. یادې ادارې د بېړنیو مرستو د رسولو پر اړتیا ټينګار کړی دی. بلخوا بیا په افغانستان کې د ملګرو ملتونو د بشري استوګنې پروګرام هم ویلي، چې له ګاونډیو هیوادونو راستانه شوي زرګونه کډوال او د زلزلې له امله زيانمنې شوې کورنۍ د ژمي په سړه هوا کې د سرپناه له نشتوالي سره مخ دي. دغه پروګرام يکشنبه د سلواغې پر ۵مه ویلي د دې خلکو اړتیاوو ته رسیدګي باید وځنډول نه شي.