بېکدلي: ایران به ډېر ژر ا.ا په رسمیت وپېژني

په کابل کې د ایران د سفارت سرپرست علي رضا بېکدلي ویلي، د ا.ا د رسمیت‌پېژندنې پر وړاندې کوم خنډ نشته او ایران به ډېر ژر ا.ا په رسمیت وپېژني. علي‌رضا بیګ‌دلي له طلوع نیوز سره په مرکه کې ویلي، له افغانستان سره د څو اړخیزو اړیکو د پراختیا نیت لري او په مناسب وخت کې به د دغو اړیکو د پیاوړتیا لپاره د رسميت‌پېژندنې اعلان وکړي. نوموړي دغه راز ویلي، ایران یوازې په افغانستان کې د نورو د لاسوهنې له امله اندېښنه لري. بیګ‌دلي د کابل او تهران ترمنځ د شته ننګونو،  د سرحدي مسایلو او د حق‌ابې په اړه وویل، د ښه ګاونډیتوب له لیدلوري سره دواړه هېوادونه کولی شي دغو مسایلو ته د ګواښ پر ځای د فرصت په سترګه وګوري. هغه زیاته کړه، دا مهال د دواړو هېوادونو ترمنځ سرحدي ستونزې تر ډېره حل شوې او د سرحدونو دعصري کولو هڅې روانې دي.