د هند او پاکستان نیابتي جګړه؛ اسلام اباد ادعا کوي چې هند یې پر وړاندې افغان خاوره کاروي

پاکستان ادعا کړې ده چې هند یې پر وړاندې افغان خاوره کاروي. د پاکستان د بهرنیو چارو وزارت او پوځ په یوه ګډه خبري غونډه کې ویلي چې هند په پاکستان کې له ګڼو ترهګرو ډلو ملاتړ کوي او په خبره یې هندي استخبارات له هند او افغانستان په پاکستان کې فعالیتونه ترسره کوي. پاکستان وایي دوی اړ دي چې له خپلو خلکو دفاع وکړي نو له همدې امله یې د هندي استخباراتو د فعالیتونو پر ضد اقدامات کړي دي. افغان نظامي او سیاسي چارواکو تل ویلي چې افغانستان د هند او پاکستان د نیابتي جګړې په ډګر اوښتی دی. هند هم تل وایي چې په افغانستان کې د پاکستان نفوذ ددوی په زیان دی او پاکستان هم ادعا کوي چې هند افغان خاوره ددوی پر وړاندې کاروي. تر دې وړاندې په ځلونو پاکستاني چارواکو دا هم ویلي وو چې په افغانستان کې امن د کشمیر له مسئلې سره تړلی دی او که دغه مسئله حل شي نو په افغانستان کې به ارامي راشي. ددې ټولو مسایلو له امله په افغانستان کې د هند او پاکستان په نیابت جګړه روانه ده چې هره ورځ د سلګونه افغانانو ژوند اخلي.