افغان حکومت د پاکستاني لوري پر وروستۍ ادعا غبرګون ښودلی دی. د هېواد د بهرنیو چارو وزارت له لوري په خپره شوې اعلامیه کې راغلي چې افغان خاوره د هېڅ ګاونډي هېواد پر ضد نه ده کارول شوې او نه هم چا ته اجازه ورکول کېږي چې له افغان خاورې د نورو پر ضد ترهګریز فعالیتونه ترسره کړي. افغان حکومت ویلي چې پاکستان له افغان خاورې د ترهګریزو فعالیتونو د ترسره کېدو په اړه بې بنسټه خبره کړې ده. بهرنیو چارو وزارت وایي چې د ملګرو ملتونو امنیت شورا یو با صلاحیته پلاوی دې وګومارل شي څو په افغانستان کې ترسره شوي ترهګریز فعالیتونه او د پاکستان ادعاوې وڅېړي. سرچینه کاږي چې افغانستان د ترهګرۍ پر وړاندې په روانه مبارزه کې په لومړۍ کرښه کې دی او افغانانو له دې درکه درنه قرباني ورکړې ده. افغان حکومت د پاکستاني حکومت څرګندونې غندلې، هغه یې بې بنسټه او تش په نامه ادعاوې بللې دي. د پاکستان او افغانستان ترمنځ داسې مهال ناندرۍ رامنځ ته کېږي چې د پاکستان لومړی وزیر به راتلونکې اونۍ افغانستان ته راځي.
