عامې روغتیا وزارت وايي، چې تېر کال په ټول هېواد کې شاوخوا دوه میلیونه کسانو د رواني ناروغیو د درملنې لپاره، د دې وزارت اړوندو روغتونو ته مراجعه کړې ده. د عامې روغتیا وزارت ویاند شرافت زمان امرخېل ویلي، چې په دې شمېر کې د اضطراب او سختو رواني ناروغیو ناروغان شامل دي او دوی ته روغتیايي او مشورتي خدمات وړاندې شوې دي. په ورته وخت کې ارواپوهان ټینګار کوي، چې د رواني ناروغیو پېژندنه او درملنه کې د عامه پوهاوي پراخول خورا مهم رول لري.
