خلیلزاد: پاکستان به د افغانانو له سخت غبرګون سره مخ شي

د افغان سولې لپاره د امریکا پخواني ځانګړي استازي زلمي خلیلزاد د پاکستان د پوځي رژیم وروستیو بریدونو ته په اشارې ویلي، چې دا اقدام د منلو وړ نه دی. نوموړي خبرداری ورکړی، چې اسلام‌اباد باید ژر تر ژره د کړکېچ کچه راکمه کړي او د خبرو مېز ته کیني، که نه نو د افغانانو له سخت غبرګون سره به مخ شي. خلیلزاد همدارنګه پوښتنه کړې، چې ایا په اسلام‌اباد کې واکمن بنسټونه دا توان لري چې پاکستان په مسوولانه ډول رهبري کړي؟ هغه ټینګار کړی، چې د سیمې ثبات د تاوتریخوالي له لارې نه، بلکې د خبرو او متقابل درناوي له لارې تضمینېدای شي. نوموړي له پاکستانه غوښتي چې د کړکېچ د پراخېدو پر ځای د تفاهم او ډیپلوماسۍ لاره خپله کړي.