د افغانستان د ملي دفاع وزارت سرپرست وایي ددې امکان شته چې بهرني ځواکونه په افغانستان کې د کمېدو پر ځای ډېر شي. اسدالله خالد چې نن یې ولسي جرګې ته د باور رایې اخیستو لپاره خپل راتلونکي پروګرامونه تشریح کول وویل افغان پوځ دمګړی پیاوړی دی او له خپلې خاورې ددفاع پوره وړتیا لري. اسدالله خالد وویل پوره ډاډه دی چې تر دې دمه د بهرنیو ځواکونو په شمېر کې د پام وړ کموالی نه دی راغلی او داسې نه ښکاري چې دوی دې له دې ځایه ووځي، خو ددوی له حضور سره سره افغان پوځ ۹۶ سلنه عملیات پخپله ترسره کوي. خالد دغه راز وايي ددې احتمال شته چې د بهرنیو ځواکونو شمېر په افغانستان کې کم نه شي، بلکې برعکس ډېر شي. هغه ټينګار کړی چې دمګړی بهرني ځواکونه له دوی سره په عملیاتو کې برخه نه اخلي بلکې ټول عملیات افغان ځواکونه په مستقلانه توګه ترسره کوي. خالد دغه راز وویل چې افغان هوایي، ځمکني او کمانډو ځواکونه به تر دې هم پیاوړي کېږي او د پیاوړي کولو لپاره یې اړینې برنامې لري چې د عملي کېدو په حال کې دي. هغه له افغان ځواکونو د نړیوالو ملاتړ هم مهم وباله. خالد همدا راز وایي چې د سولې له پروسې افغان پوځ ملاتړ کوي خو د هغو ډلو پر وړاندې جدي مبارزه کوي چې د سولې مخالفې دي او د جګړې لوری یې نیولی دی.
