د ۲۰۲۶م کال په لومړيو دوو مياشتو کې، د چين د صنعت، مصرف، پانګونې او بهرنۍ سوداګرۍ په شمول مهم اقتصادي شاخصونه لوړ شوي او اقتصاد يې ثابت پرمختګ موندلی دی.
يادو شاخصونو د چين د اقتصادي پرمختګ لپاره ښه بنسټ برابر کړی دی.
بهرنيو خبري رسنيو په څېړنيزو راپورونو کې ويلي، چې د چين د اقتصاد ټينګ بنسټ او له اټکل نه وتلي پرمختګ نړيوال اقتصاد ته خوځنده ځواک ورکړی دی.
روان کال د چين د پنځلسم پنځه کلن پلان لومړی کال دی. خو د چين اقتصاد به د نړۍ د جيوپوليټکي سياست د خطرونو د زياتوالي او ناثابتوالو عواملو په حال کې څنګه ښه پيل او پرمختګ ومومي؟
د چين صنعتي فابريکو د روان کال په لومړيو دوو مياشتو کې پوره هڅې کړي او په همدې مودې کې يې د لويې پيمانې صنعت د زياتوالي اندازه ۶ اعشاريه ۳سلنې ته رسېدلې وه.
په چين کې د پسرلني اختر په رخصتۍ کې ډېر لګښتونه شوي، په دغه هېواد کې په تېرو دوو مياشتو کې د مصرفي توکو د پلور عمومي اندازه ۲ اعشاريه ۸ سلنه زياته شوې او د خدمتي چارو د مصرف اندازه يې ۵ اعشاريه ۶ سلنه زياته شوې ده. په ورته وخت کې د بنسټيزو تاسيساتو په جوړولو کې يې د پانګونې اندازه ۱۱ اعشاريه ۴ سلنه زياته شوې او د سړکونو او پلونو جوړولو یې نه يوازې اقتصادي پرمختګ هڅولی، بلکې د خلکو ژوند ته یې هم زياتې اسانتياوې برابرې کړې دي. دا ټولې چارې د چيني اقتصاد د ثابت پرمختګ او د بازار د پراخوالي ښکارندويي کوي.
شنونکي د چين د اقتصاد ثابت پرمختګ د نړيوال اقتصاد لپاره ډېر مهم بولي.
د چين د ژنمين پوهنتون د اقتصادي پوهنځي پروفيسور وانګ شياو سونګ پر دې اند دی، د نړيوال اقتصاد پرمختګ د کمزورتيا او د جيوپوليټکي سياست د خطرونو لوړوالي پر وړاندې د چين د اقتصاد ثابت پرمختګ د بنسټونو په ټينګښت، انعطاف او پراخې انرژۍ پسې تړاو لري. د چين حکومت د اقتصاد د باکيفيته پرمختګ لپاره دقيقې تګلارې غوره کړي او څرګندې اغېزې يې ښندلې دي. د چين د اقتصاد ثابتوالی د باکيفيته پرمختګ پر بنسټ ترلاسه شوی دی.
د چين په پنځلسم پنځه کلن پلان کې پر باکيفيته پرمختګ، ساينس او ټېکنالوژۍ او خپلواک پرمختګ ټينګار شوی دی. د چين ثابتو تګلارو نړيوالو پانګوالو ته لوری روښانه کړی او په دغه هېواد کې يې پانګونې ته لېواله کړي دي.
د جرمني کارچير ګروپ د روان کال په پيل کې د جيانګ سو ولايت په چانګ شو ښار کې خپله درېيمه فابريکه پرانيستلې او د ۳۰ ميليونو يوانو په ارزښت پانګونه يې پکې کړې ده.
د جرمني د بي اېس اېچ (BSH) د کورنيو بريښنايي ماشينونو توليدي ګروپ يوه چارواکي رسنيو ته ويلي، چې په چين کې د نويو مصرفي توکو د اخيستلو په بدل کې د زاړو مصرفي توکو ورکول او هم د مرستندويه پيسو د تګلارې په رڼا کې د دغه ګروپ د سيمنس (Siemens) او بوسچ (BOSCH) کورني بريښنايي ماشينونه په زياته اندازه پلورل شوي دي.
د دغه چارواکي په وينا، شرکت یې د چين د کورنيو اړتياوو بازاري فرصتونو او د باکيفيته پرمختګ راتلونکي ته لېواله دی.
د چين اقتصاد ته په کتو، د لوړې ټېکنالوژۍ نوښت د پرمختګ مهم لامل بلل کېږي.
د روان کال په لومړيو دوو مياشتو کې د چين د لوړې ټېکنالوژۍ د صنعتي چارو د زياتوالي اندازه د تېر کال د همدې مودې په پرتله ۱۳ اعشاريه ۱سلنه زياته شوې، چې دا د عادي صنعت په پرتله يو چند زياتوالی ښيي.
په چين کې د درې ډي (3D) پرېنټر د ماشينونو او صنعتي روبوټونو توليدي اندازې په جلا جلا توګه ۵۴ اعشاريه ۱سلنه او ۳۱ اعشاريه ۱سلنه زياتې شوې دي.
د فرانسې د داساولټ (Dassault) شرکت يوه چارواکي رسنيو ته ويلي، چې شرکت يې د چين د نويو صنعتي چارو د پرمختګ له فرصته ګټه پورته کړې او توليدي چارو يې ډېر پرمختګ موندلی دی.
د نوښت په مرکزيت پرمختيايي بڼه نه يوازې د چين د اقتصادي جوړښت د شکل لوړتيا هڅوي، بلکې د نړۍ د بېلا بېلو هېوادونو د صنعتي چارو د لوړتيا لپاره مرستندويه انرژۍ او همکاريزه فضا هم برابروي.
د چين انعطاف منونکي بهرني تجارت نړۍ ته د ورخلاصون چانسونه برابر کړي دي.
په چين کې د سوداګرۍ غوښتنې پر له پسې لوړېږي او د روان کال په لومړيو دوو مياشتو کې يې د توکو د وارداتو او صادراتو اندازه ۱۸ اعشاريه ۳سلنه زياته شوې، چې په دې جمله کې د وارداتو اندازه يې د تېر کال د همدې مودې په پرتله ۱۷ اعشاريه ۱سلنه زياته شوې ده.
دا د دې ښکارندويي کوي، چې د چين کورنۍ اړتياوې د لوړېدو په حال کې دي او د چين بازار نړيوالو تصديو ته سوداګريز فرصتونه برابر کړي دي.
د چين د پنځلسم پنځه کلن پلان له مخې، په دغه هېواد کې د وارداتو او صادراتو همغږي د عملي کېدو په حال کې ده.