د ټولګټو چارو وزارت وزیر ملا محمد عیسی ثاني په کابل کې د ایران له سفیر عليرضا بیکدلي سره په کتنه کې د دواړو هېوادونو ترمنځ د اقتصادي او زیربنایي همکاریو پر پراختیا خبرې کړې دي. په دې لیدنه کې د میل ۷۸ ابو نصر فراهي سړک د دویم لاټ د رغنیزو چارو چې تر اوسه يې ۴۲ کیلومتره کارونه پرمخ تللي خبرې شوې دي. بېکدلي ویلي، د سړک د لومړي لاټ د ترمیم لپاره بودجه ځانګړې شوې او په نږدې راتلونکي کې به یې عملي چارې پیل شي. یاد سړک د افغانستان او ایران ترمنځ د سوداګریزو توکو د لېږد او ټرانزیټ لپاره مهمه لار بلل کېږي. دواړو لورو د اقتصادي اړیکو د پیاوړتیا او د بنسټیزو پروژو د دوام پر نږدې همکارۍ ټینګار کړی دی.
