د چين د کمونېست ګوند د مرکزي کمېټې د سیاسي بیورو غړي او بهرنيو چارو وزير وانګ يي د جون په ۱۶مې نېټې د پاکستان له مرستیال صدراعظم او خارجه وزیر محمد اسحاق ډار سره تليفوني خبرې کړې دي.
اسحاق ډار له چيني سیال سره په خبرو کې د ايران او امریکا ترمنځ د لومړي پړاو خبرو د هوکړې معلومات شريک کړي او له چين څخه يې مننه کړې چې په تېرو څو مياشتو کې يې له پاکستان سره نږدې تماس ساتلی او د دغې هوکړې د لاسليک په ترڅ کې يې د پاکستان له منځګړيتوب څخه ملاتړ کړی دی.
نوموړي ويلي، هېواد به یې له چين سره همغږۍ او د نظريو تبادلې ته دوام ورکړي، د امريکا او ايران ترمنځ د سوله يېزو خبرو اوسني تمايل به وساتي او له چين سره د سيمې د دايمي سولې او ثبات د ساتلو لپاره به فعال رول ولوبوي.
وانګ يي د ايران او امریکا ترمنځ د شوې هوکړې د لاسليک له امله پاکستان ته مبارکي ويلي او د سولې هڅې يې د چين او پاکستان په شمول د ټولو هېوادونو نړيوال مسؤليت بللی دی.
نوموړي ويلي، دا د وړاندوينې وړ ده، چې د امريکا او ايران د دویم پړاو خبرې به د لومړي پړاو په پرتله ډېرې سختې وي، خو اړوندې خواوې باید بیا پوځي زور ونه کاروي او په خبره يې، نړيواله ټولنه دې د ايران او امريکا ترمنځ د خبرو لپاره ګټوره زمینه برابره کړي او د ملګرو ملتونو د امنيت شورا په شمول څو اړخیز ارګانونه دې لا مثبت رول ولوبوي.
وانګ يي زیاته کړې، چين به له پاکستان سره د ايران او امریکا ترمنځ د سولې د خبرو د پرمخبېولو، په منځني ختيځ کې د سولې او ثبات د بيا رامنځته کولو او د پرمختګ موندلو لپاره ګډې هڅې وکړي.