د چین د کمونېست ګوند د مرکزي کمېټې د سیاسي بيورو غړي او بهرنیو چارو وزیر وانګ يي د مې په ۲۱مې نېټې د فيلپين په پلازمېنې مانیلا کې د اسیان له عمومي منشي کاو کیم هونګ سره ليدلي دي.
وانګ يي له نوموړي سره په ليدنې کې ويلي، چې سږ کال د جنوب ختیځې اسیا د دوستۍ او همکارۍ تړون د لاسلیک ۵۰مه کلیزه ده او په خبره یې، چین لومړی لوی هېواد دی چې په دغه تړون کې يې ګډون کړی او په دې تړون کې د نورو لويو هېوادونو د ګډون لپاره يې هڅوونکی رول لوبولی دی، په دې سره د اسیان نړیوال مقام یې د پام وړ لوړ کړی دی.
نوموړي ويلي، سږ کال د چین او اسیان ترمنځ د هراړخيزې ستراتیژیکي ملګرتیا د جوړېدو ۵مه کلیزه ده. چين به له اسیان سره همکارۍ پیاوړې کړي، د چین-اسیان ګډې ګټې او د پرمختيايي هېوادونو عادلانه حقونه به خوندي وساتي.
وانګ يي جنوبي سمندر د سیمه ييزو هېوادونو ګډ کور یاد کړی او زياته کړې يې ده، چې د چين جنوبي سمندر مسئله باید د چین او اسیان د اړیکو پر وړاندې خنډ ونه ګرځي. چین به په دې مسئلې کې د موجودو عناصرو د له منځه وړلو، د جنوبي سمندرګي د چلند قانون په اړه د مشورتي پروسې د ګړندۍ کېدو او د جنوبي سمندرګي د سولې، ثبات، همکارۍ او دوستۍ د هڅولو لپاره له اسيان سره ګډ کوښښونه وکړي.
