افغانستان ته د ازبکستان صادرات ۹۶۱.۵ میلیونه ډالرو ته رسېدلي

افغانستان د ۲۰۲۶ کال په لومړۍ نیمایي کې د ازبکستان د صادراتو په مهمو بازارونو کې خپل ځای لوړ کړی او د دغه هېواد د توکو درېیم لوی صادراتي بازار ګرځېدلی دی. د ازبکستان د ملي احصایې کمېټې د تازه شمېرو له مخې، د روان کال په لومړیو شپږو میاشتو کې افغانستان ته د دغه هېواد د صادراتو ارزښت ۹۶۱.۵ میلیونه ډالرو ته رسېدلی دی. په دې لړ کې روسیه د شاوخوا ۲.۴ میلیارد ډالرو په صادراتو لومړی او چین د نږدې ۱.۴ میلیارد ډالرو په ارزښت دویم ځای لري. د افغانستان او ازبکستان ترمنځ د سوداګرۍ د پراختیا په لړ کې د برېښنا، خوراکي توکو، ودانیزو توکو او صنعتي محصولاتو صادرات مهم رول لري.