په مزارشریف کې د روضې شریفې د بیارغونې چارې پیل شوې

د بلخ ولایت ځایي چارواکي وایي، چې د مزارشریف ښار د روضې شریفې د تاریخي ودانۍ د ټولو برخو د بیارغونې چارې په رسمي ډول پیل شوې دي. د مالوماتو له مخې د دغې تاریخي ودانۍ د بیارغونې لګښت د کورنیو چارو وزیر سراج‌الدین حقاني پر غاړه اخیستی دی. روضه شریفه د بلخ له مهمو تاریخي او مذهبي ودانیو څخه ده چې ستر تاریخي جومات او ګڼ ارزښتناک تاریخي اثار په کې موجود دي. د وروستیو زلزلو له امله د دې ودانۍ ځینې برخې زیانمنې شوې وې.