په دوحه کې د مذاکراتو په دوام، تازه د ملي مصالحې عالي شورا رییس وایي چې سر له نن به په دوحه کې جدي بحثونه پيل شي. هغه تازه د سولې په تړاو په یوه جوړه شوې غونډه کې د خبرو پر مهال وویل چې په مذاکراتو کې د پام وړ پرمختګونه رامنځته شوي چې ورسره هیلې هم ډېرې شوې دي. په مذاکراتو کې داسې مهال د پرمختګونو خبره کېږي، چې د زندانیانو د خوشي کولو پر سر ناندرۍ رامنځته شوې دي. امریکا وایي، طالبان ښایي د خپلو پاتې زندانیانو د خوشي کولو غوښتنه وکړي، خو افغان حکومت دا ورسره نه مني.
سره له دې چې په دې وروستیو کې په هېواد کې جګړې شدیدې شوې، خو د سولې په برخه کې هم له پرمختګونو خبر ورکړل شوی دی. تازه د ملي مصالحې عالي شورا رییس ډاکتر عبدالله عبدالله په خپلو څرګندونو کې ویلي، چې د سولې په خبرو کې پرمختګونو رامنځ ته شوي او د دواړو لورو مذاکراتي ټیمونو درې ورځې پر له پسې پر بېلو مسایلو خبرې کړې دي. د ده په خبره، سر له نن (چهارشنبې) به په دوحه کې جدي مذاکرات پيل شي. د ده په خبره: ((په دوحه کې په مذاکراتو کې د پام وړ پرمختګ رامنځته شوی دی. هیلې ډېرې شوې دي. دواړو لورو درې ورځې پرله پسې له یو بل سره پر اړوندو مسایلو خبرې کړې او ټاکل شوې چې په چهارشنبه به جدي بحثونه پيل شي)).
عبدالله عبدالله دا نه ده واضح کړې چې جدي بحثونه به څه وي، خو وایي چې پر اوربند توافق وخت ته اړتیا لري. سره له دې چې اوربند د افغانانو تر ټولو ستره غوښتنه ده او د افغان حکومت مذاکراتي پلاوی هم وایي چې اوربند یې د بحثونو په سر کې دی، خو د ملي مصالحې عالي شورا رییس وایي چې پر اوربند د یوه توافق رامنځته کېدل به یو څه وخت وغواړي. د ده په خبره: ((اوربند لومړیتوب دی، د افغانستان د خلکو غوښتنه ده، خو پر دې مسئله هوکړې ته رسېدل به لږ وخت وغواړي)).
عبدالله وایي، تمه ده چې په دوحه کې مذاکرات به افغانستان یوې دایمي سولې ته ورسوي. د ده په خبره، که طالبان سوله کوي او تاوتریخوالی کموي، نو له خپل نرمښت به پښېمانه نه شي؛ ځکه دواړه لوري به په افغانستان کې پر یوه ګډ حکومت توافق ته ورسېږي.
بلخوا په دوحه کې د افغان حکومت د مذاکراتي پلاوي یوه غړې فاطمه ګیلاني وايي، د اجنډا پر چوکاټ خبرې روانې دي او د دواړو لورو مذاکراتي پلاوي هره ورځ خپلو مذاکراتو او بحثونو ته ادامه ورکوي. نوموړې ویلي چې د افغانانو غوښتنې به په جدي توګه مطرح کوي او له هغو به دفاع کوي. د نوموړې په خبره: ((موږ خبرو ته ادامه ورکوو، د خلکو غوښتنې مطرح کوو، ټول هغه څه مو په یاد دي چې تاسې له موږ غوښتي دي)).
د سولې په اړه یادې څرګندونې داسې مهال کېږي چې د طالبانو د پاتې زندانیانو خوشي کول هم په یوه ناندریزه مسئله بدل شوي دي. امریکا وایي چې ښایي طالبان د خپلو پاتې بندیانو د خوشي کولو غوښتنه وکړي، خو افغان حکومت بیا هم ټینګار کړی چې د بندیانو خوشي کول د سولې راوستلو لار نه ده.
د ملي امنیت شورا د دفتر ویاند تازه له رسنیو سره په خبرو کې ویلي چې په تېر پړاو کې د طالبانو شاوخوا پنځه زره بندیان خوشي شول، خو د جګړې په کمولو کې ګټور نه وو، نو له همدې امله باید دا ومنل شي چې د اووه زره نورو بندیانو خوشي کول هم د جګړې په کمولو کې ګټور نه تمامېږي.
