د بشري حقونو خپلواک کمیسیون: مذاکراتي پلاوي دې ژر پر اوربند سره سلا شي

د افغانستان د بشري حقونو خپلواک کمیسیون وایي د مذاکراتو دواړه لوري باید ژر تر ژره پر اوربند هوکړې ته سره ورسېږي. ددغه کمیسیون مشرې شهرزاد اکبر په تازه څرګندونو کې ویلي دي چې روانه جګړه د ملکي وګړو لپاره خورا خونړۍ ده او هره ورځ د لسګونه افغانانو ژوند اخلي. د نوموړې په وینا په دوحه کې د مذاکراتو دواړو لورو ته په کار ده چې ژر تر ژره او تر هر څه وړاندې پر اوربند هوکړې ته سره ورسېږي. دغه غوښتنه داسې مهال مطرح کېږي چې له شاوخوا درېیو میاشتو راهیسې په دوحه کې بین الافغاني مذاکرات روان دي خو ایله څو ورځې کېږي چې دواړه لوري پر تګلاره هوکړې ته سره رسېدلي دي.