هرات کې یوه فابریکه هره ورځ ۲۵ ټنه روب تولیدوي

د هرات په صنعتي ښارګوټي کې یوه فابریکه هره ورځ تر ۱۵۰ ټنه رومي بانجان پروسس کوي او د ورځې تر ۲۵ ټنه پورې روب تولیدوي. د هرات ولایت مقام وايي، دغه فابریکه د روب ترڅنګ د لوبیا کنسرو هم تولیدوي او ۷۰ کسانو ته یې د کار زمینه برابره کړې ده. د چارواکو په وینا، اوس مهال په هرات کې ۱۳ فابریکې د روب او مربا د تولید په برخه کې فعالیت کوي. د هرات ولایت مقام دغه بهیر د کورنیو تولیداتو د ودې، د وارداتو د کمېدو او د هېواد د ځان‌بسیاینې لپاره مهم بولي.