افغان پلاوي د چین نړۍواله امنیتي غونډه کې ګډون کړی

د کورنیو چارو وزارت د دفتر لوی رییس زین‌الله عابر او سر یاور عبدالرحیم ثاقب په مشرۍ لوړپوړي افغان پلاوي د چین په نړۍواله امنیتي غونډه کې ګډون کړی دی. افغان پلاوي په دې غونډه کې د افغانستان د امنیتي وضعیت، امنیتي تګلارو او د سیمه‌ییزو او نړیوالو امنیتي همکاریو په اړه د ا.ا دریځ له ګډونوالو سره شریک کړی دی. د کورنیو چارو وزارت استازو ویلي، افغانستان ژمن دی چې خپله خاوره به د ګاونډیو او نورو هېوادونو پر وړاندې د ناامنۍ رامنځته کولو لپاره ونه کارول شي. افغان استازو دغه راز د ترهګرۍ، نشه‌یي توکو، قاچاق او سازمان‌یافته جرمونو پر وړاندې له چین او د سیمې له نورو هېوادونو سره د امنیتي همکاریو پر پراختیا ټینګار کړی دی.